Ո՞ւմ բաժին կհասնի Ավան-«Դալմա Գարդեն Մոլլ» թիվ 15 երթուղին
Երևանի քաղաքապետարանը այսօր հայտարարել է Երևան քաղաքում ընդհանուր օգտագործման ավտմոբիլային տրանսպորտով ուղևորների կանոնավոր փոխադրումներն իրականացնող կազմակերպությունների ընտրության նոր մրցույթ` թվով 24 երթուղիների համար։ Ուշագրավն այն է, որ այդ 24 երթուղիներից 23-ը ավտոբուսային են, և միայն մեկն է սպասարկվում միկրոավտոբուսներով՝ թիվ 15 երթուղին (Ավանից «Դալմա Գարդեն Մոլլ» առևտրի կենտրոն)։
Նշենք, որ վերջերս քաղաքապետարանի կողմից հրապարակված ցանկի համաձայն՝ այդ երթուղին սպասարկվում է «Կոստանդյան եղբայրներ» ՍՊԸ-ի կողմից։
Հիշեցնենք նաև, որ ըստ «Ժառանգություն» կուսակցության քարտուղար Ստեփան Սաֆարյանի՝ նշված Կոստանդյան եղբայրներից մեկը ԱԺ նախկին պատգամավոր Գագիկ Կոստանդյանի որդին է, ով դատախազության աշխատակից է հենց Ավանում: Սաֆարյանը նաև նշել էր, որ այդ երթուղու միկրոատոբուսները 2012 թվականի դեկտեմբերի 2-ին ապօրինաբար հանվել էին գծերից ու սպասարկում էին Տարոն Մարգարյանի աներորդու՝ Ռոբերտ Սարգսյանի ընտրողներին:
Նշենք, որ դիմումներն ընդունվում են մինչև 2013թ. սեհտեմբերի 9-ը ներառյալ, որից 5 օր հետո անցկացվելու է բուն մրցույթը։ Այնպես որ, մի քանի շաբաթից պարզ կլինի՝ թիվ 15 երթուղին կմնա Կոստանդյան եղբայրների՞ն, թե՞ կհայտնվի այլոց ձեռքերում։
