Օհանյանը խոստանում է, որ Կոմիտաս 5 հասցեում կլինի ոչ թե 14, այլ 7 հարկանի շենք (լուսանկարներ)
Երևանի փոխքաղաքապետ Դավիթ Օհանյանը Կոմիտաս 5 հասցեում հավաքված քաղաքացիների հետ զրույցում խոստացավ, որ 2 օր հետո Երևանի քաղաքապետարանը բնակիչներին կներկայացնի տվյալ տարածքում 7 հարկանի շինության թույլտվությամբ հաստատված նախագիծ: Հիշեցնենք, որ այդ տարածքում նախատեսված էր կառուցել 14 հարկանի բարձրահարկ շենք:
Սակայն «Ժառանգության» անդամ Հովսեփ Խուրշուդյանն ընդվզեց՝ ասելով, թե հաստատված նախագիծը ենթադրում է, որ այն այլևս հնարավոր չի լինի փոփոխման ենթարկել, ուստի ավելի լավ է նախ ներկայացնել նախագիծը, քննարկել, ապա՝ հաստատել: Սակայն Դավիթ Օհանյանն ասաց, թե հաստատված նախագիծը հնարավոր կլինի լրամշակել, բացի այդ, ըստ նրա՝ նախագծում հաշվի են առնվելու քաղաքացիների բոլոր պահանջները: Նա նաև տեղեկացրեց, որ այսօր ժամը 16-ին հանդիպելու է քաղաքապետ Տարոն Մարգարյանին, որի ընթացքում նրան կներկայացնի բնակիչների պահանջները:
