Ձերբակալվելու մասին խոսակցությունների նպատակն ինձ ահաբեկելն է. Ռուստամ Իբրահիմբեկով
Ադրբեջանական Turan լրատվական գործակալության փոխանցմամբ՝ Ժողովրդավարական ուժերի Ազգային խորհրդի (ԺՈՒԱԽ) նախագահ, առաջիկան նախագահական ընտրություններում ադրբեջանական ընդդիմության միասնական թեկնածու Ռուստամ Իբրահիմբեկովը մեկնաբանել է ադրբեջանական մի շարք ԶԼՄ-ների կողմից շրջանառության մեջ դրված այն տեղեկատվությունը, թե Ադրբեջան վերադառնալու դեպքում իրեն ձերբակալելու են.
«Դրա համար պատճառներ չկան՝ թեև այդ մասին խոսակցություններ են տարածվում: Նպատակն ինձ ահաբեկելն է, սակայն դա չի հաջողվի նրանց»: Գործակալությանը չի հաջողվել տվյալ հարցի շուրջ մեկնաբանություն ստանալ Գլխավոր դատախազությունից: Ռուստամ Իբրահիմբեկովը Բաքու է վերադառնալու հուլիսի 31-ին:
