Գորիսի քաղաքապետ. Վրեժը միշտ էլ վրեժ է բերում. մամուլ
«Ժամանակ» օրաթերթի լրագրողը հունիսի 1-ի երեկոյան Գորիսում հնչած կրակոցների շուրջ զրուցել է Գորիսի քաղաքապետ Նելսոն Ոսկանյանի հետ:
– Պարոն Ոսկանյան, Հայաստանի թիվ մեկ խնդիրը կարծես դարձել է Գորիսը: Ավելին՝ մամուլում արդեն շրջանառվում է հնարավոր վրեժխնդրության հարցը: Ի՞նչ է կատարվում Գորիսում:
– Նախապես ասեմ, որ համաձայն չեմ թիվ մեկ արտահայտության հետ՝ որպես ՀՀ թիվ մեկ խնդիր կամ համայն հիմնախնդիր: ՀՀ-ն շատ հիմնախնդիրներ ունի, բայց կարող եմ ավելացնել, որ տեղի է ունեցել ցավալի փաստ. մարդ է մահացել, որը անհանդուրժողության մթնոլորտի արտահայտման ձևերից մեկն է: Ինչ վերաբերում է վախի կամ վրեժխնդրության մթնոլորտին, դրանք այն երևույթներն են, որոնք մարդկային կյանքի համար անհարիր են: Ի՞նչ է նշանակում՝ մարդ վախենում է, չի վախենում, մարդը զգույշ է լինում, և այդ զգուշությունը այնպիսի դաստիարակություն է, որ բոլորի մոտ էլ պետք է լինի: Երկրորդ՝ վրեժը միշտ էլ վրեժ է բերում, կան համապատասխան պետական մարմիններ, որոնք պետք է և՛ քաղաքական, և՛ իրավական գնահատականներ տան հարցի լուծման վերաբերյալ: Գորիսն իր առօրյա կյանքով է ապրում: Պարզ է՝ տխուր է ամբողջ մթնոլորտը թե՛ ղեկավարման, թե՛ մարդկային հարաբերությունների տեսանկյունից, բայց դրա հետևանքները կլուծվեն հետագայում:
– Մամուլում կատարվածի վերաբերյալ վարկածները բազմաթիվ են, այս օրերին խոսե՞լ եք արդյոք Սյունիքի մարզպետի հետ, ի՞նչ է ասում ինքը:
– Ես տեսել եմ Սյունիքի մարզպետին, ինչ-որ չափով քննարկել ենք այդ հարցը, նա ցավում է կատարվածի համար: Ես մասնակցել եմ Բուդաղյանների ընտանիքի սգո արարողությանը, շատ ցավալի է: Պարզապես գնահատական տալու իրավունք չունեմ, քանի որ գնահատականը համապատասխան իրավական մարմիններն են տալու: Մամուլը հաճախ այնպիսի բաներ է ասում, գրում, թե ես մահացել եմ…
– Իսկ այն, որ մարզպետը Գորիսում չէ…
– Ոչ, ինքը երկու օր քաղաքում էր, կարծեմ Երևան պետք է ժամաներ և հետ գար, քանի որ ինքը իր լիազորությունների ժամանակավոր դադարեցման համար դիմում է գրել կառավարությանը, չգիտեմ՝ երբ է քննարկելու կառավարությունը և համապատասխան կուսակցական մարմինը:
– Այսինքն՝ ինքը տա՞նն է, Գորիսո՞ւմ:
– Անշուշտ: Այդ օրն էլ շատ ուրախ օր է եղել, այդ օրը հանդիպումը շատ ուրախ օր է եղել և՛ մարզպետի, և՛ Ավետիքի համար, պարզապես վատ ավարտ է ունեցել:
– Մարզպետը Ձեզ ասե՞լ է, թե ինչ է տեղի ունեցել:
– Ես ընդհանուր հանդիպումներ եմ ունեցել, իսկ ընդհանուր հանդիպումների ժամանակ այդպիսի մանրամասն քննարկումներ չեն լինում: Որոշակիորեն ասեմ, որ մարզպետը ցավում է կատարվածի համար, քանի որ մարդ կորցնելը երկու կողմի համար էլ շատ վատ է, չեմ ուզում ավելին մեկնաբանել:
Ամբողջական հարցազրույցը կարող եք կարդալ «Ժամանակի» այսօրվա համարում: