Միջադեպ՝ հանձնաժողովի քարտուղարի և ԲՀԿ-ական նախկին մարզպետի միջև (տեսանյութ)
Քիչ առաջ Ս. Սպանդարյանի անվան թիվ 24 դպրոցում տեղակայված 9/11 ընտրատեղամասում հանձնաժողովի քարտուղար Կարինե Նալբանդյանի և ԲՀԿ ավագանու ցուցակի 4-րդ համարը զբաղեցնող Վայոց ձորի նախկին մարզպետ Սերգեյ Բագրատյանի միջև փոքր միջադեպ տեղի ունեցավ։ Պատճառն այն էր, որ «Բարև Երևան» դաշինքի վստահված անձը ցանկանում էր նստել վստահված անձանց համար նախատեսված աթոռին, որը տվյալ պահին զբաղեցնում էր ԲՀԿ վստահված անձը։ Հանձնաժողովի քարտուղարը խնդրեց ԲՀԿ-ի վստահված անձին իր տեղը զիջել «Բարև Երևան» դաշինքի վստահված անձին։ Այդ պահին ներս մտավ Սերգեյ Բագրատյանը և Կարինե Նալբանդյանին ասաց. «Հանրապետականների խաղերը բոլորս գիտենք, դուք չպետք է ասեք` որտեղ նստենք»։ Կարինե Նալբանդյանը պահանջեց Սերգեյ Բագրատյանից հեռանալ ընտրատեղամասից։
