«Գյումրիում հնչած կրակոցները սովորական հանցագործություն էին». մամուլ

«Գյումրին շարունակում է պահել Հայաստանի քրեական հայրաքաղաքի համբավը: Երեկ այնտեղ նորից կրակոցներ հնչեցին ՀՀԿ-ԲՀԿ մասնակցությամբ: Գյումրիում եղած խոսակցությունների համաձայն, երեկվա կրակոցները շարունակությունն են նախկին քաղաքապետ՝ ՀՀԿ-ական Վարդան Ղուկասյանի և ԲՀԿ-ական Մարտուն Գրիգորյանի միջև տարիներ շարունակ ձգվող հակամարտության:

Շիրակի նախկին մարզպետ Աշոտ Գիզիրյանի պաշտոնանկությունը թերևս տեղի ունեցավ այն պատճառով, որ նախկին մարզպետին գրեթե անհնար էր դարձել հատկապես Գյումրիում իրավիճակը վերահսկելը: Եվ հատկապես ընտրությունների ժամանակահատվածում Գյումրին աչքի էր ընկնում կրիմինալ միջադեպերով»,- գրում է «Հրապարակ» օրաթերթը և ներկայացնում Շիրակի նորանշանակ մարզպետ, նախկին ԿԳԲ-ական Ֆելիքս Ցոլակյանի հետ հարցազրույցը.

– Պարոն Ցոլակյան, տեղյա՞կ եք Գյումրու կրակոցների մասին:

– Ես պետք է Ձեզ ասեմ, որ ոչ մի քաղաքական ենթատեքստ պետք չէ փնտրել, լրիվ անձնական հողի վրա է: Մանրամասներն արդեն կարող եք հարցնել իրավապահ կառույցներից, ես մանրամասներին չեմ տիրապետում: Հանցագործություն է սովորական, մարդիկ զբաղվում են:

– Պարոն Ցոլակյան, Ձեր կողմից «սովորական» որակումը ստացող հանցագործությունները, երբ քաղաքական տարբեր հայացքներ ունեցող մարդկանց կողմնակիցները կրակում են իրար վրա, իսկապես դարձել են սովորական: Բայց փաստ է, որ տարիներ շարունակ այստեղ ՀՀԿ-ական Վարդան Ղուկասյանի…
Հարցն անավարտ է մնում:

– Ես կրկնում եմ՝ քաղաքական որևէ ենթատեքստ այստեղ չեմ տեսնում: Բացառվում է:

– Կենցաղայի՞ն էր, ինչ է, օրինակ, Ձեզ հայտնի, համենայն դեպս ոստիկանության հաղորդագրությունում ոչինչ չի ասվում:

– Իսկ ի՞նչ է ասվում ոստիկանության հաղորդագրության մեջ: Ես կրկնում եմ, որ բացարձակ կապ չունի քաղաքականի հետ, դա սովորական ջահելների կռիվ է, որը միշտ էլ եղել է: …Դուք ինչ էիք անընդհատ ասում՝ քրեական, չգիտես ինչով մարզն առաջինն է, բայց ես էս վերջերս վերցրեցի-նայեցի, թե որտեղ ավելի շատ հանցագործություններ կան և այլն, և այլն, բայց տեսա, որ Գյումրին չէր առաջին տեղը, և Շիրակը չէր առաջին տեղը:

– Ամենաաղմկոտ և դաժան միջադեպերն այժմ Ձեր ղեկավարած մարզում են լինում:

– Դա ուրիշ հարց է, ամեն ինչով առաջինն են, էլի:

– Պարոն Ցոլակյան, երբ Դուք նշանակվում էիք Շիրակի մարզպետ, որպես ուժային համակարգի վաստակաշատ պաշտոնյայի՝ Ձեզ հետ մեծ հույսեր էին կապում, որ մարզում կզսպեք քաղաքական հակառակորդների և, առհասարակ, քրեական կլանների ակտիվությունը:

– Հիմա ի՞նչ, ես պետք է գնամ մա՞րդ բռնեմ, թե՞ ինչ, որ ուժային կառույցի ներկայացուցիչ եմ եղել:
Ես արդեն ուժային կառույցի ներկայացուցիչ չեմ, հիմա ուժային կառույցներ կան, որոնք իրենց աշխատանքները կատարում են:

– Դե, նկատի ունեի՝ որպես մարզի ղեկավար և երբեմնի ազդեցիկ պաշտոնյա, պետք է որ կարողանայիք գոնե Ձեր ղեկավարած մարզում քաղաքական հակադիր ուժերի կամ կլանային խմբավորումների մոտ զսպվածության մեխանիզմ գործի դնել:

– Բայց սա քաղաքական ուժերի հետ ի՞նչ կապ ունի, ճամբար չկա, ես Ձեզ նորից եմ ասում՝ հին վեճեր են մարդկանց մեջ, բերել-կապել և դարձնել քաղաքական՝ քաղաքական չէ:

– Ի՞նչ եք կարծում՝ Ձեր ասած «սովորական» միջադեպերը, որոնց ժամանակ, ի դեպ, մարդ է մահանում, այսուհե՞տ էլ հաճախակի կլինեն Ձեր ղեկավարած մարզում և հատկապես Գյումրիում: Եվ ընդհանրապես՝ կարելի՞ է սովորական նայել նման դեպքերին:

– Այսինքն ի՞նչ… Ես նայում եմ որպես սովորական հանցագործություն, ես սովորական վեճեր չասացի, ես սովորական չեմ նայում այն դեպքին, երբ արդեն մարդ է մահանում, դա սովորական չի կարող լինել, դա արդեն արտառոց է, և ամեն մեկն իր պատիժը պետք է ստանա:

– Իսկ Ձեր նշանակումից հետո, ըստ Ձեզ, Գյումրիում քաղաքական հակասությունները մեղմացե՞լ են:

– Բավականին հանգիստ են դարձել, քանի գնա՝ լավ կլինի, իսկ նման դեպքերը ես չեմ կարող կանխել և գնալ-կանգնել, տեսնել, թե ինչ են անում:

Լուսինե Շահվերդյան