ԼՂ հակամարտության ձգձգումն ապահովում է «մեծ ուժերի» շահերը. Ադրբեջանում Իրանի դեսպան
Ադրբեջանական 1news.az լրատվական գործակալությանը տված հարցազրույցի ժամանակ Ադրբեջանում Իրանի դեսպան Մոհսեն Պակ Այինն անդրադարձել է Ղարաբաղյան հակամարտության կարգավորման խնդրին.
«Ղարաբաղյան հակամարտության կարգավորված չլինելու պատճառը ԵԱՀԿ Մինսկի խմբի՝ այդ խնդիրը լուծելու անկարողությունն է: Կարծում եմ, որ դա որևէ կապ չունի Իրանի հետ Հայաստանի հարաբերությունների հետ: Իրանա-ադրբեջանական կապերը ձևավորվել են երկու հարևան երկրների միջև հարաբերությունների շրջանակներում:
Ադրբեջանի հետ բարեկամակական հարաբերություններ ունեցող մյուս երկրներն է՛լ ավելի լայն հարաբերություններ են պահպանում Հայաստանի հետ, քան՝ Իրանը: Կարծում եմ, որ Իրանի հանդեպ մեղադրանք հնչեցնելով՝ մի շարք անձինք ձգտում են կոծկել ԵԱՀԿ Մինսկի խմբի թույլ կողմերը:
Հակամարտության ձգձգումն ապահովում է «մեծ ուժերի», ինչպես նաև ԵԱՀԿ Մինսկի խմբում համանախագահող երկրների շահերը: Այդ ուժերը չեն ձեռնարկում լուրջ ջանքեր հակամարտության կարգավորման ուղղությամբ:
Ղարաբաղյան հակամարտության կարգավորման ձգձգումը չի ծառայում տարածաշրջանում խաղաղության ու կայունության հաստատմանը: Իրանը կողմնակից է այդ հակամարտության շուտափույթ կարգավորմանը»:
