ԲՀԿ-ն պետք է խորոված ուտի
Այսօր Մոսկվայի տանը ԲՀԿ անդամ պատգամավորներ Գուրգեն Արսենյանը, Նաիրա Զոհրաբյանը, Ստեփան Մարգարյանը և Տիգրան Ուրիխանյանը հանդիպեցին Կենտրոն վարչական շրջանի ընտրողների հետ: Նրանք կոչ էին անում ակտիվորեն գնալ և մասնակցել ընտրություններին և իրենց քվեով որոշել թե ով է ապագա չորս տարիներին ղեկավարելու Երևանը:
Գուրգեն Արսենյանը՝ խոսելով տարածվող այն մտքի մասին, թե ընտրությունների հաղթողը կանխորոշված է, և պայքարը երկրորդ երրորդ տեղի համար է, մի օրինակ բերեց:
Նա ասում է, որ այդ խոսակցությունները նման են նրան, որ ընտանիքիդ հետ գնում ես ռեստորան, պատվիրում ես «զակուսկին», ջրեղենը, խորովածը, բայց բերում են միայն առաջին երկուսը: Իսկ երբ խորոված են բերում, այն տանում են կողքի սեղանին՝ ասելով որ ձեզ խորոված չի կարելի, չնայած խորովածի գինը մտցնում են հաշվի մեջ:
Խորովածը, ըստ էության՝ իշխանությունն է, որը դրվում է միայն ՀՀԿ-ականների առաջ, իսկ ԲՀԿ-ին բաժին է հասնում միայն «զակուսկին» և ջրեղենը: Արսենյանը ասում է, որ այս վիճակը պետք է փոխել, այսինքն՝ ԲՀԿ-ն ևս պետք է խորոված ուտի:
