Human Rights Watch-ն Ադրբեջանի իշխանություններին կոչ է արել ազատ արձակել ձերբակալված ակտիվիստներին
Ադրբեջանական Turan լրատվական գործակալության փոխանցմամբ՝ Human Rights Watch (HRW) միջազգային իրավապաշտպան կազմակերպությունը դտապարտել է Ադրբեջանում NIDA-ի 7 անդամի ձերբակալումը՝ կապված մարտի 10-ի ակցիային մասնակցելու հետ:
HRW-ի տարածած հայտարարությունում հիշեցվում է, որ մարտի 10-ի ակցիայից հետո NIDA-ի ձերբակալված անդամների քանակը հասել է 7-ի: Բոլոր ձերբակալվածներն էլ հանդիսանում են Facebook և Twitter սոցցանցերի օգտատերեր:
HRW-ի Եվրասիայի գծով ներկայացուցիչ Ռեյչել Դենբերը հայտարարել է, որ Ադրբեջանի իշխանությունները փորձում են բողոքող երիտասարդությանը ստիպել լռել՝ դրանով իսկ ահաբեկելով մյուս ակտիվիստներին ևս: HRW-ն ընդգծում է, որ Ադրբեջանի իշխանությունները նախկինում նույնպես փորձել են ահաբեկել երիտասարդներին՝ նրանց գրպանը գցելով թմրանյութեր և կեղծ մեղադրանքներ ներկայացնելով նրանց դեմ:
HRW-ն ընդգծում է, որ ձերբակալման ժամանակ խախտվել է NIDA-ի անդամների պաշտպանվելու իրավունքները: HRW-ն Ադրբեջանի իշխանություններին կոչ է արել ազատ արձակել 7 ակտիվիստին՝ չեղյալ հայտարարելով նրանց դեմ ներկայացված մեղադրանքները:
