Մինչև տարեվերջ Դիլիջանում կկառուցվի 50 սոցիալական բնակարան
Ս.թ. նոյեմբերին Դիլիջանում շահագործման կհանձնվի 50-52 սոցիալական բնակարան, այսօր ասել է ծրագրի իրագործող Ազգային սոցիալական բնակարանային ասոցիացիայի (ԱՍԲԱ) տնօրեն Արա Նազինյանը: Այս մասին տեղեկացնում է Banks.am-ը։
Հանդես գալով այսօր Երևանում թեմայի շուրջ անցկացվող կոնֆերանսին` Արա Նազինյանն ասել է, որ սոցիալական բնակարաններում մատչելի վարձակալությամբ կարող են բնակվել Դիլիջանի ցածր և միջին եկամուտներ ունեցող բնակիչները, ինչպես նաև նրանք, ովքեր կցանկանան տեղափոխվել Դիլիջան: Ցանկության դեպքում բնակիչները կարող են նաև սեփականաշնորհել այդ բնակարանները:
«Եթե մինչ այժմ Հայաստանում կատարվող սոցիալական բնակարանաշինությունը ֆինանսավորվում էր պետբյուջեից կամ դոնորների միջոցներից, հիմա այժմ առաջին անգամ ֆինանսավորվում է մասնավոր ներդրողների կողմից, որի դերում հանդես է եկել հոլանդական DIGH կազմակերպությունը, իսկ ծրագրի ֆինանսավորման երաշխիքները տրամադրվել են հոլանդական բնակարանային կորպորացիայի կողմից»,- ասել է Արա Նազինյանը:
Նրա խոսքով, առաջին փուլի (երկրորդ փուլում Դիլիջանում նախատեսվում է կառուցել ևս 150 բնակարան) ներդրման ընդհանուր ծավալը կկազմի €1,3-1,5 մլն: Գումարը կուղղվի ոչ միայն բուն շինարարությանը, այլև անհրաժեշտ բոլոր ենթակառուցվածքների ստեղծմանը և շրջակա տարածքի բարեկարգմանը:
Արա Նազինյանը տեղեկացրել է, որ սոցիալական բնակարանային համալիրների ներդրումային ծրագրերն ու նախագծերն արդեն պատրաստ են իրագործման համար նաև Հրազդանում (48 բնակարան) և Վանաձորում (80 բնակարան): Աշտարակում (50-150 բնակարան) նախագիծը և ներդրումային ծրագիրը մշակման փուլում են:
Եվս 8 համայնքներում պահանջարկի գնահատման նպատակով արդեն իրականացվել է շուկայական վերլուծություն:
«Մատչելի բնակարանային ֆոնդի կարիքը Հայաստանում բավականին մեծ է և շարունակում է աճել, սակայն շուկան դեռևս հանդես չի գալիս համապատասխան առաջարկով, ինչը լուրջ խոչընդոտ է համայնքների զարգացման համար»,- ասել է Արա Նազինյանը:
Կոնֆերանսին մասնակցող ՀՀ աշխատանքի և սոցիալական հարցերի նախարար Արտեմ Ասատրյանն ասել է, որ կառավարությունը ևս սկսել է գործնական քայլեր կատարել սոցիալական բնակարանաշինության ուղղությամբ: «Կառավարության առաջին փորձը սոցիալական բնակարանաշինության ոլորտում Մարալիկում կառուցվող շենքն է, որի բնակարանները տրամադրվելու են քաղաքի մանկատան շրջանավարտներին: Մեր նպատակն է, սակայն, ստեղծել այնպիսի պայմաններ, որպեսզի սոցիալական բնակարանները հասանելի լինել ոչ միայն առանձին խոցելի խմբերին, այլև բոլոր ցանկացողներին, քանի որ պահանջարկն այստեղ շատ մեծ է: Հետևաբար, մեզ համար խիստ օգտակար է համագործակցությունը ԱՍԲԱ-ի պես մասնագիտացված կառույցի հետ` սոցիալական բնակարանաշինության միջազգային լավագույն փորձը Հայաստանում ներդնելու համար»,- ասել է նախարարը:
ԱՍԲԱ հիմնադրամը ստեղծվել է 2010 թ-ին հայ-հոլանդական համագործակցության արդյունքում: Հիմնադրամի նպատակն է մատչելի և որակյալ բնակարանների տրամադրումը Հայաստանի ցածր և միջին եկամուտ ունեցող ընտանիքներին: Հայաստանում սոցիալական բնակարանների զարգացման ծրագիրը իրականացվում է Նիդերլանդների ԱԳՆ ֆինանսական աջակցությամբ:
