«Խորհրդարան մտած ուժերը իշխանությունների նախընտրածն են». Արման Մելիքյան
ԼՂՀ նախկին արտգործնախարար Արման Մելիքյանը համարում է, որ այսօր Հայաստանում ընդդիմություն գոյություն չունի: Նրա համոզմամբ, ընդդիմությունն ինքնավարկաբեկվել է և ունակ չէ որևէ բան փոխել քաղաքական կյանքում:
«ՀԱԿ-ը և խորհրդարան անցած մյուս ուժերը չկարողացան հանձնել քաղաքական սկզբունքայնության քննությունը և, ըստ էության՝ տապալվեցին՝ հայտնվելով խորհրդարանում»,- ասում է Արման Մելիքյանը:
Նրա համոզմամբ, խորհրդարանական ընդդիմադիր կուսակցությունների դաշտը կաթվածահար է եղել, իսկ իշխանություններն էլ՝ վակուումի մեջ են: «Սա հասարակության կողմից բերում է լուրջ հոռետեսության: Սա մի իրավիճակ է, որը հատկապես Հայաստանի շուրջ ահագնացող զարգացումների կողքին լուրջ մտահոգության տեղիք է տալիս»,- նշեց Արման Մելիքյանը:
Չնայած նման հոռետեսական գնահատականներին, Արման Մելիքյանը համոզված է, որ, այնուամենայնիվ, քաղաքական դաշտում փոփոխություններ կարելի է ակնկալել:
Նա կտրականապես դեմ է այն տեսակետին, թե ընտրությունների ելքը կանխորոշված է, և որ այն կանխորոշվել է ԲՀԿ նախագահ Գագիկ Ծառուկյանի չառաջադրվելու մասին որոշմամբ: Արման Մելիքյանը համոզված է, որ երբեք չի կարելի նման կանխատեսում անել, քանի որ կարող են ի հայտ գալ նոր հանգամանքներ: Ըստ նրա՝ արտաքին ազդակներրը ևս կարող են փոխել այդ ելքը:
«Հայաստանն արտաքին ազդեցությունների առաջ բաց է: Բոլոր կողմից ազդակներ կարող են ուղարկվել և ընկալվել որպես գործողության ազդանշան»,- ասաց նա:
Խոսելով արտաքին գործոնների մասին՝ Արման Մելիքյանն առանձնացրեց Ռուսաստանին, և հատկապես՝ ԱՄՆ-ին:
Հետընտրական հնարավոր զարգացումների մասին խոսելիս՝ Արման Մելիքյանը նշեց, որ ինչպես բուն ընտրությունները, այնպես էլ՝ դրանից հետո ստեղծված մթնոլորտն ավելի հանգիստ կլինի, քան նախորդ ընտրությունների ժամանակ էր:
Պատասխանելով 168.am-ի հարցին, թե նախագահական ընտրություններում հնարավոր թեկնածուներից ո՞վ կպայքարի երկրորդ տեղի համար, Արման Մելիքյանը պատասխանեց.
«Տվյալ պարագայում՝ արդեն էական չէ: Քանի դեռ գործընթացները զարգանում են իշխող ուժի սահմանած խաղի կանոներով, կարևորն առաջին տեղն է: Երկրորդ տեղում կլինի նա, ում կհատկացնի առաջին տեղը: Ընտրությունների զարգացման հայկական ավանդույթը թույլ է տալիս իշխանություններին ընտրություն կատարել՝ ո՞ւմ տալ նախապատվությունն այսօր: Ի վերջո, խորհրդարան մտած բոլոր ուժերը թե’ այս, թե’ նախորդ ընտրություններում՝ իշխանությունների նախընտրած են»:
