Եհովականների հերթական հայցն ընդդեմ Հայաստանի
Նոյեմբերի 27-ին Մարդու իրավունքների եվրոպական դատարանը` ի թիվս 22 դատական գործերի, վճիռ կկայացնի Խաչատրյանը և այլոք ընդդեմ Հայաստանի Հանրապետության գործով:
Ըստ ՄԻԵԴ-ի պաշտոնական կայքէջի, դիմումատուները Հայաստանի 19 քաղաքացիներ են, ովքեր «Եհովայի վկա» կազմակերպության անդամներ են: Նրանք, իշխանություններին ուղղված դիմումի համաձայն, 2004 թ.-ից գործող այլընտրանքային ծառայության մասին օրենքով սահմանված կարգով, կրոնական հողի հիման վրա, զինվորական ծառայության փոխարեն անցել են այլընտրանքային ծառայության հիվանդանոցներում, դիսպանսերներում: 2005թ.-ի մայիսին և հունիսին նրանք տեղեկացրել են համապատասխան կառույցներին որ, քանի որ այլընտրանքային ծառայությունն եղել է բանակի վերահսկողության տակ, նրանք չեն շարունակում ծառայել և լքել են իրենց ծառայության վայրերը:
Մի քանի ամիս կալանքի տակ գտվելուց հետո նրանց դեմ հարուցվել է քրեական գործ` ծառայության հաստատություններն ինքնակամ լքելու համար, որը հետագայում կարճվել է: Նրանք բողոքարկում են ձեռբակալության մասին որոշումը, որով խախտվել է Մարդու իրավունքների և հիմնարար ազատությունների եվրոպական կոնվենցիայի 5-րդ հոդվածի 1-ին մասով սահմանված ազատության և անձեռնմխելիության իրավունքը, ինչպես նաև 5-րդ մասով սահմանված` անօրինական կալանքի համար փոխհատուցման իրավունքը:
Դիմումատուները բողոքում են, որ իրենց մերժել են փոխհատուցել անօրինական կալանքի դիմաց:
