Հայաստանի բնակիչների մեծ մասը կարծում է, որ մեկ տարի անց ոչինչ չի փոխվի
Հայաստանի 1067 բնակիչների 42 տոկոսը կարծում է, որ մեկ տարի անց ինքն ու իր ընտանիքը կապրեն նույն կերպ: Արդյունքը ստացվել է «Gallup International Association»-ի հայկական գրասենյակի հարցումներով, որն այսօր լրագրողների հետ հանդիպման ընթացքում ներկայացրեց «Gallup International Association» հայկական գրասենյակի տնօրեն Արամ Նավասարդյանը:
Վերջինիս հաղորդմամբ՝ հարցվածների 18 տոկոսը նշել է, որ որոշ չափով լավ կապրի, 17 տոկոսը՝ որոշ չափով վատ, 14 տոկոսը դժվարացել է պատասխանել հարցին, 7 տոկոսը պատասխանել է, որ զգալիորեն ավելի վատ կապրի: Հարցվածների միայն 3 տոկոսն է կարծում, որ զգալիորեն ավելի լավ կապրի:
«Gallup International Association»-ի հայկական գրասենյակի հետազոտությունների բաժնի ղեկավար Գայանե Դաջունցի հաղորդմամբ՝ հարցումներն իրականացվել են Հայաստանի ամբողջ տարածքում հոկտեմբերի 9-20-ն ընկած ժամանակահատվածում: Հարցումներն իրականացվել են դեմ առ դեմ:
