Բաժիններ՝

Նորարարական գաղափարներ՝ մտքի փառատոնում

Հոկտեմբերի 27-ին տեղի ունեցավ «Սալվադոր ֆեստ» մտքի փառատոնի երրորդ փուլը։ Տարբեր բուհերի մարքեթինգային (PR/գովազդ/բիզնես) ամբիոնների ուսանողներն ու երիտասարդ մասնագետները պրոֆեսիոնալ ժյուրիի և հեղինակավոր կազմակերպություններից հրավիրված մասնագետների ներկայությամբ ներկայացրին իրենց նորարարական առաջարկները և լսեցին պրոֆեսիոնալների կարծիքները։ Տեղի ունեցան նաև մասնագիտական քննարկումներ: Այս մասին 168.am-ին տեղեկացնում են Հայաստանի երիտասարդական հիմնադրամից:

Ժյուրին, որի կազմում էին «Հայկական ՓԻԱՌ ասոցիացիա» գիտատեղեկատվական հ/կ նախագահ Աստղիկ Ավետիսյանը, քաղտեխնոլոգ Տիգրան Քոչարյանը, տեղեկատվության անվտանգության մասնագետ Սամվել Մարտիրոսյանը, ԱԿԲԱ-Կրեդիտ Ագրիկոլ բանկի գլխավոր մարկետոլոգ Հարություն Պողոսյանը, Կառավարման խորհրդատուների հայաստանյան ասոցիացիայի խորհրդի անդամ Հրաչուհի Բարսեղյանը, շուրջ 40 երիտասարդներից ընտրեցին լավագույն աշխատանքները ներկայացրած մասնակիցներին: Ծրագրի այս փուլում հաղթած երիտասարդներն առաջիկա օրերին կհանդիպեն համապատասխան ոլորտները ներկայացնող պետական բարձրաստիճան պաշտոնյաների հետ և հնարավորություն կունենան ներկայացնելու իրենց նորարարական առաջարկներն ու մտքերը:

Ժյուրիի անդամ Աստղիկ Ավետիսյանը կարևորեց մտքի փառատոնի անցկացման գաղափարը։ «Երիտասարդները փայլում են կրեատիվությամբ, նրանք ուսումնասիրել են ամբողջ դաշտը և փորձում են ներկայացնել այն գաղափարները, որոնք իսկապես հասարակությանը կարող են օգտավետ լինել և դառնալ բիզնես։ Մանրադրամներ ստեղծելու փայլուն մի գաղափար կար։ Մարդիկ հաճախ հայտնվում են գումարը մանրելու խնդրի առջև, և առաջարկվող սարքավորումը տրանսպորտային համակարգում պետք է ոչ միայն լուծեր այդ խնդիրը, այլև կատարեր տեղեկատվական գործառույթներ»,- նշեց Աստղիկ Ավետիսյանը։

Մարքեթինգի հայկական ակումբի ղեկավար Տարոն Պարսամյանի տեղեկացմամբ՝ նման միջոցառումների նպատակն է բացահայտել հետաքրքիր, ինքիատիպ մտքեր ունեցող երիտասարդներին, ապահովել նրանց կապը պրոֆեսիոնալ մասնագետների հետ, որպեսզի տեսանելի լինեն պոտենցիալ գործատուների համար, ինչպես նաև՝ երիտասարդներին հնարավորություն տալ ինքնաարտահայտվելու մասնագիտական  հանրության առջև։

«ՙՍալվադոր ֆեստ» մտքի փառատոնի կազմակերպիչներն են Հայաստանի երիտասարդական հիմնադրամը և Մարքեթինգի հայկական ակումբը։ Փառատոնի գործընկերներն են eMedia.am լրատվական գործակալությունը, Dinamica Testing Centre ծրագրավորման ընկերությունը:

Բաժիններ՝

Տեսանյութեր

Լրահոս