ՀԱՊԿ գլխավոր քարտուղարը գնահատական է տվել հանցագործին արդարացնելու Ադրբեջանի քայլերին
ՀԱՊԿ գլխավոր քարտուղար Նիկոլայ Բորդյուժան Ռամիլ Սաֆարովին Հունգարիայից Ադրբեջան տարհանձնելու և նրան ներում շնորհելու վերաբերյալ հետևյալ կարծիքն է հայտնել.
«Ադրբեջանական իշխանությունների որոշումը, ըստ որի նրանք ներում են շնորհել և ազատել են պատասխանատվությունից Հունգարիայի Հանրապետության կողմից իրենց հանձնված՝ հայ սպայի մարդասպանին, չի համապատասխանում եվրոպական իրավունքի ստանդարտներին, այն կասկածի տակ է դնում հանցագործության դեմ պայքարի միջպետական համաձայնագրերը:
Այս քայլը, որը փաստացի ուղղված է հօգուտ կարճաժամկետ քաղաքական նպատակների, չի կարող ոչ մի կերպ արդարացվել: Ավելին, հանցագործին հերոսացնելը կնպաստի տարածաշրջանային լարվածության կտրուկ մեծացմանը:
Ես վստահ եմ, որ միջազգային հանրությունը չի հապաղի օբյեկտիվ գնահատական տալ տեղի ունեցածին»:
