«Ես Րաֆֆուն ասել եմ՝ դու չեկիստություն ես անում, դո՞ւ պետք է որոշես՝ ԱԻՄ-ականը խոսի՞, թե՞ չխոսի». Պարույր Հայրիկյանը բացում է փակագծերը
«ԿԳԲ-ի գործակալ են բոլոր նրանք, ովքեր փորձում են ԱԻՄ-ի ձայնը լսելի չդարձնել»,- 168.am-ի հետ զրույցում՝ խոսելով օրերս «Նոր Հայաստան» հանրային փրկության ճակատի հասցեին հնչեցրած իր խիստ քննադատությունների մասին՝ ասաց ԱԻՄ առաջնորդ Պարույր Հայրիկյանը:
Հիշեցնենք, որ Պ. Հայրիկյանը «Նոր Հայաստանի» անդամներին անվանել էր «ԿԳԲ-ի գործակալներ, ծախվածներ և ողորմելիներ, որոնց նպատակը փող աշխատելն է»: Նա նշեց, որ դեկտեմբերի 4-ի հանրահավաքին մասնակցող քաղաքացիները չստացան իրենց հարցերի պատասխանները, թե ինչպես իրենց պետք է պահեն գործընթացի՝ հանրաքվեի ժամանակ:
«Երբ ես կարողացա միջին մի լուծում գտնել, հանկարծ նկատեցի, որ ներքին պայմանավորվածություն կա որոշակի դրսևորումների վերաբերյալ, քանի որ երկար ճանապարհ եմ անցել, մի բան որ տեսնում եմ, միանգամից մի ամբողջ համակարգ է իմ մտքում հառնում, ու հիշում եմ, թե ինչ իրավիճակներում՝ ինչպես է վարվել, դրա համար խիստ գնահատականներ տվեցի, բայց դա իմ պարտքն է»:
Նշենք նաև, որ երեկ ՀԱԿ-ի կազմակերպած՝ մարդու իրավունքների պաշտպանության օրվան նվիրված միջոցառմանը նաև ներկա էր ԱԻՄ-ը: Պ. Հայրիկյանի խոսքով՝ իրենց կանոնադրության մեջ ունեն կետ, որ եթե դեկտեմբերի 10-ին՝ մարդու իրավունքների պաշտպանության օրվան նվիրված որևէ միջոցառում կա, իրենք մասնակցում են: Մեր այն հարցին՝ եթե ՀՀԿ-ն էլ կազմակերպած լիներ, մասնակցելո՞ւ էիք, ԱԻՄ առաջնորդն այսպես պատասխանեց. «Եթե մարդու իրավունքների վերաբերյալ միջոցառում է լինելու, մենք որևէ խոչընդոտ չենք տեսնում: Եթե դուք կարծում եք՝ շատ տարբեր են նախկին ՀՀՇ-ն և ներկայիս ՀՀԿ-ն, սխալվում եք, նրանք միասնական թիմով են կեղծել առաջին Սահմանադրության հանրաքվեն»: Ներկայացնում ենք Պարույր Հայրիկյանի հետ մեր զրույցը:
– Ձեր հարցազրույցում ասում եք՝ ուզում են փող աշխատեն, ո՞ւմ նկատի ունեք:
– Անուններ չեմ նշի, ինքը գիտի, որ իրեն նկատի ունեի:
– Ասել եք նաև՝ «ծախված են, ԿԳԲ-ի գործակալներ են», չե՞ք հստակեցնի՝ կոնկրետ ո՞ւմ մասին է խոսքը:
– Որևէ անուն չեմ նշի, քանի որ դա էական չէ: Օրինակ, ՀԱԿ-ի հանրահավաքին ԱԻՄ-ական Գագիկ Սարուխանյանը դիմել էր, որ ստորագրել ենք հռչակագրի տակ, պետք է միասին աշխատենք, բայց հանրահավաքի ժամանակ նրանք ասում են՝ ժամանակ չունենք, չի տեղավորվում: Դա չեկիստական մոտեցում է:
– «Ժառանգություն» կուսակցության և «Հիմնադիր խորհրդարանի» հետ նախկինում այլ հարցերով էլ եք համագործակցել, այս ամենը Ձեզ համար նո՞ր բացահայտվեց, թե՞ Ձեր ասածները կոնկրետ «Հիմնադիր խորհրդարանին» և «Ժառանգությանը» չեն վերաբերում:
– Մարդկային հարաբերություններում այդպես է, դուք ձեր սիրած տղայի հետ հանդիպելիս կարող եք նկատել, որ նա ծխում է, բայց այդ հարցը կարևորագույնը չհամարեք, բայց ընդհանրացնող ավելի կարևոր բաներ կան, ասենք՝ մեր ծնողներին հաճելի լինելը, և այլն:
– Կոնկրետ Ձեր նշած «արատները»՝ «ԿԳԲ-ի գործակալ, ծախված լինել»… եթե նկատել եք, ինչպե՞ս եք համագործակցել:
– ԿԳԲ-ի գործակալ են բոլոր նրանք, ովքեր փորձում են ԱԻՄ-ի ձայնը լսելի չդարձնել: Ես այս ամենը մինչև հանրաքվեն չէի ասում, հիմա ասում եմ, որ սթափվեն, զգաստանան, եթե սթափվեն ու զգաստանան, կուլիսների հետևում ասեն՝ «ներողություն, մենք այն օրը գլուխներս կորցրել էինք», ես էլ կասեմ ՝լավ, հրապարակավ կասեմ, որ խիստ եմ քննադատել իմ ընկերներին, որովհետև չեմ ուզում որևէ բացասական բան տեսնել:
– Գուցե թյուրիմացություն է եղել, անձամբ չե՞ք խոսել նրանց հետ:
– Նամակ եմ ուղարկել 6 պատասխանատուներին, որ վաղը հանրահավաքին 2 ԱԻՄ-ականներ պետք է 10-15 րոպե ելույթ ունենան, կամ, եթե դուք հարմար կգտնեք, ես կխոսեմ: Մեկ էլ հանկարծ ասում են, որ՝ ձեր մարդիկ կխոսեն այսինչ տեղերում, այսինքն՝ ոչ թե հրապարակում, այլ մեկ այլ տեղում, որը իրենք էլ չգիտեն՝ որն է: Դա չեկիստություն է, ԱԻՄ-ի չխոսելը եղել է չեկիստների ցանկությունը:
– Այսքանից հետ «Նոր Հայաստանի» հանրահավաքներին մասնակցելո՞ւ եք:
– ԱԻՄ-ը որոշում չի ընդունել չմասնակցելու, բայց այսօր, երբ ինձ հարցրին՝ լինելո՞ւ եմ, ասացի՝ ոչ:
– Բոլորին է հայտնի Րաֆֆի Հովհաննիսյանի լավ վերաբերմունքը Ձեր և ԱԻՄ-ի նկատմամբ, գուցե փորձեիք իր հետ խոսեիք, գուցե ինքը չգիտե՞ր՝ ինչ է կատարվում:
– Ես Րաֆֆու հետ խոսել եմ, դրա համար էլ համարձակվեցի նրա մասին ասել, որ՝ դու չեկիստություն ես անում: Ես Րաֆֆիին եմ ասել, դո՞ւ պետք է որոշես՝ ԱԻՄ-ական խոսի՞, թե՞ չխոսի:
– Այսինքն՝ որոշողը նա՞ է եղել:
– Չէ, ինքն ասում է՝ ես չեմ եղել, ուրիշ մեկն է եղել, բայց դու ես վարողը, ԱԻՄ-ականը չպե՞տք է խոսի ու ասի, որ կա միասնական մոտեցում: Դա դավաճանություն էր, դա չեկիստություն էր: Սա տասներորդական հարց է, վաղը Րաֆֆին իր ճանապարհով է գնալու, Ժիրայրը՝ իր ճանապարհով է… մի դրվագ է, զանգեն-ասեն՝ «Պարույր, կներես, սխալ եմ եղել», ես էլ կասեմ՝ «դուք էլ կներեք, տաքացա», բայց հիմա ավելի լուրջ հարց կա՝ մեր երկիրը ձեռքից գնում է, քանի որ հիմնական օրենքը՝ Սահմանադրությունը, պղծվեց:
– Ընդդիմության պառակտվածութան պարագայում ինչպե՞ս եք պատկերացնում պայքարի հետագա ընթացքը:
– Պառակտվածություն չկա, մենք ՀԱԿ-ի հավաքին էլ մասնակցեցինք: Հիմա էլ, եթե կարևոր հարց կլինի, մենք կհամագործակցենք, բայց եթե պետք է ինչ-որ մեկը շատ հարգելի կամ պակաս հարգելի որոշի, որ պետք է իմ իրավունքները ոտնահարի, պարզ չէ՞, որ պետք է ասեմ՝ չափդ իմացիր:
– Այսինքն՝ այս իրավիճակով էլ՝ կարելի՞ է միասին պայքարել:
– Դուք, եթե կարծում եք, որ քննադատությունը և խիստ քննադատությունը նշանակում է՝ վերջնական կապերի խզում կամ մահվան դատավճիռ, ճիշտ չեք: Ես պարտավոր էի ասել այն, ինչ ասել եմ, բայց ես չեմ ասում, որ նրանք մահացու սխալ են թույլ տվել:
Մանրամասները՝ 168.am-ի տեսանյութում:
