Սերժ Սարգսյանը վերընտրվեց Շախմատի ֆեդերացիայի նախագահի պաշտոնում
Հայաստանի Հանրապետության Նախագահ Սերժ Սարգսյանը միանձնյա վերընտրվեց Հայաստանի շախմատային ֆեդերացիայի նախագահի պաշտոնում:
«Արմենպրես»–ի հաղորդմամբ` Երևանի Տիգրան Պետրոսյանի անվան շախմատի տանը կայացավ Հայաստանի շախմատային ֆեդերացիայի հաշվետու-ընտրական կոնֆերանսը: Կոնֆերանսի 114 պատվիրակներից ներկա էին 95-ը: Ֆեդերացիայի 2013-17 թվակաների աշխատանքային հաշվետվությամբ հանդես եկավ Ֆեդերացիայի նախագահի առաջին տեղակալ Սմբատ Լպուտյանը: Վերջինս իր խոսքում անդրադարձավ հանրապետության մարզերում առկա խնդիրներին` առաջարկելով Արարատի մարզում բացել շախմատային դպրոց: Բացթողումներից մեկը առաջին տեղակալը համարեց նաև ակումբային առաջնության բացակայությունը: Ձեռքբերումներից Լպուտյանն առանձնացրեց այն, որ վերջին 4 տարիներին միջազգային մրցաշարերում շախմատիստները նվաճել են 120 մեդալ, որոնցից 67-ը՝ ոսկե:
Ելույթներով հանդես եկան նաև վերահսկիչ հանձնաժողովի նախագահ Արմեն Գևորգյանը, պատվիրակներ: Այնուհետ պատգամավորներն անցան ֆեդերացիայի ղեկավար մարմնի ընտրությանը. Հայաստանի շախմատային ֆեդերացիայի նախագահի պաշտոնում միանձնյա վերընտրվեց ՀՀ Նախագահ Սերժ Սարգսյանը:
«Աշխատելու ենք, որպեսզի Ֆեդերացիայի հաջորդ կոնֆերանսին շախմատում ունենանք նոր հաջողություններ: Համոզված ենք, որ մենք 5 նոր շախմատի դպրոց ենք ունենալու մեր մարզերում: Մենք ուղղակի պարտավոր ենք մինչև հաջորդ կոնֆերանս աշխարհի 100 լավագույն շախմատիստների շարքում ունենալ 5 գրոսմայստեր: Ժամանակն է նաև, որ ունենանք շախմատի գիտահետազոտական ինստիտուտ»,-ասաց ՀՀ Նախագահը:
Ընտրվեցին նաև Ֆեդերացիայի նախագահությունը և վերստուգիչ հանձնաժողովը: Ֆեդերացիայի նախագահի առաջին տեղակալի պաշտոնում վերընտրվեց Սմբատ Լպուտյանը:
