Մալայզիայում զմռսել են սպանված Կիմ Չեն Նամի մարմինը
Մալայզիայի իշխանությունները զմռսել են Կիմ Չեն Նամի՝ ԿԺԴՀ-ի առաջնորդ Կիմ Չեն Ընի ավագ եղբոր մարմինը, որը հսկողության ներքո գտնվում է Քուալա Լումպուրի դիարաններից մեկում: Այդ մասին հայտնել է TBS ճապոնական հեռուստաալիքը:
Զմռսման գործողությունը, ինչպես նշվում է, անցկացրել են մարտի 12-ի երեկոյան, որպեսզի չգրավեն լրագրողների ուշադրությունը: Մալայզիայի իշխանությունները հաստատել են, որ մտադիր են Կիմ Չեն Նամի մարմինը հանձնել միայն նրա մերձավոր ազգականներին:
Մալայզիայի իշխանությունները նաեւ հայտնել են, որ երեք շաբաթ են տալիս սպանված Կիմ Չեն Նամի ընտանիքին նրա մարմինը Քուալա Լումպուրի դիարանից վերցնելու համար, ուր այն բերվել է դատաբժշկական բոլոր փորձաքննություններն ավարտելուց հետո:
Այս հայտարարությունն արել է երկրի առողջապահության նախարար Սուբրամանիամ Սաթհասիվամը:
«Մենք գիտենք, որ նա ունի կին, երեխաներ եւ այժմ, երբ մարմինը նույնականացված է, հույս ունենք ստանալ Կիմ Չեն Նամի ընտանիքի շուտափույթ պատասխանը»,-ասել է գերատեսչության ղեկավարը: Ընդսմին նա նշել է, որ իշխանությունները պատրաստ են սպասել «երկու երեք շաբաթ»:
Եթե այդ ընթացքում պաշտոնական դիմում չստացվի, ապա «վարչապետի գրասենյակի, ներքին գործերի, արտաքին գործերի, ինչպես նաեւ առողջապահության նախարարությունների ներկայացուցիչները համատեղ որոշում կընդունեն, թե ինչ հետագա քայլեր են ձեռնարկելու»:
Կիմ Չեն Նամը մահացելէ փետրվարի 13-ին Քուալա Լումպուրի օդանավակայանից հիվանդանոց տեղափոխման ճանապարհին: Մալայզիայի առողջապահության նախարարության տվյալներով՝ մահը վրա է հասել արգելված նյարդակաթվածահարական նյութի ներգործության հետեւանքով,-հաղորդել է ՏԱՍՍ-ը:
