Շախմատային ավանդույթներ, ԹՈՒՄՈ, հայկական սմարթֆոն, Բյուրականի աստղադիտարան. Կիսելյովի ռեպորտաժը՝ Հայաստանի մասին
Ռուսական «Вести недели» լրատվական հաղորդման շրջանակում ծավալուն ռեպորտաժով անդրադարձ է կատարվել Հայաստանի տնտեսական հնարավորություններին: Անդրադառնալով Հայաստանում հնագիտական աշխատանքների բացահայտումներին` ռեպորտաժի հեղինակը պատահական չի համարում այն, որ հնագույն այս երկիրը տեխնոլոգիաների, գիտության կենտրոն է:
«Բյուրականի աստղադիտարանը հայերի համար այնպիսի յուրօրինակ խորհրդանիշ է, ինչպես Արարատ լեռը: Հայերը հպարտանում են աստղադիտարանի ձեռքբերումներով»,- նշել է հեղինակը` ներկայացնելով աստղադիտարանի պատմությունը, տեխնիկական հագեցվածությունը:
https://www.youtube.com/watch?v=R4hbliMUZLo
Հայաստանի պատմության առանձին դրվագներին անդրադառնալով` հեղինակը անցում է կատարում նորագույն ժամանակներ, պատմում հայկական արմֆոնի, «Արմթաբի» արտադրության մասին:
Հեղինակը չի շրջանցել նաև Հայաստանի շախմատային ավանդույթները: Թե ինչու են հայերը սիրում շախմատ խաղալ, հարցին ռեպորտաժում պատասխանել է Լևոն Արոնյանը: «Հայերը սիրում են շախմատ խաղալ, որովհետև այս խաղում կա արդարություն: Հայերը պատմության ընթացքում տառապել են անարդարությունից, այս խաղի միջոցով արդարության վերականգնման ձգտում կա»,-ասել է Լևոն Արոնյանը:
Ռեպորտաժում ներկայացվել է նաև ՀՀ նախագահ Սերժ Սարգսյանի՝ հայտնի լրագրող Դմիտրի Կիսելյովի հետ ավելի վաղ հրապարակված հարցազրույցից մեկ հատված: Նախագահը խոսել է իր երազանքի մասին. այն է՝ աշխարհի բոլոր հայերը համախմբվեն հայրենիքում:
Ռեպորտաժում անդրադարձ է կատարվել նաև ԹՈՒՄՈ կենտրոնի հնարավորություններին, մուլտիպլիկատոր Դավիթ Սահակյանցի աշխատանքներին:
Հաղորդավար Դմիտրի Կիսելյովը հեռուստադիտողներին տեղեկացրել է, որ մարտի 11-ին Երևանում անցկացվել է «Վալդայ» ակումբի նիստը, որին հրավիրված են եղել միջազգային էքսպերտներ:
