«Թուրքական հոսքի» շուրջ բանակցությունները կշարունակվեն Թուրքիայի ընտրություններից հետո. Նովակ
Ռուսաստանի էներգետիկայի նախարարությունը չի ակնկալում «Թուրքական հոսք» գազատարի շինարարության վերաբերյալ միջկառավարական համաձայնագիր ստորագրել Թուրքիայի իշխանությունների հետ մինչև կառավարության նոր կազմի ձևավորումը, լրագրողներին հայտնել է ՌԴ էներգետիկայի նախարար Ալեքսանդր Նովակն Արևելյան տնտեսական ֆորումի կուլիսներում: Այս մասին հայտնում է RIA Novosti-ն:
«Մենք պատրաստ ենք թեկուզ վաղը շարունակել բանակցությունները ու միջկառավարական համաձայնագրի մշակումը, սակայն, ըստ իս, նրանք դժվար կարողանան դա անել մինչև նոր ընտրություններն ու կառավարության նոր կազմի ձևավորումը»,- ասել է Նովակը:
Հիշեցնենք, որ Թուրքիայի նախագահ Ռեջեփ Թայիփ Էրդողանը օգոստոսի 28-ին հաստատել է երկրի ժամանակավոր կառավարության կազմը, որը գործելու է մինչև նոյեմբերի 1-ին նախանշված խորհրդարանական ընտրությունները:
