Հայաստանում ապաստարանների համար միասնական չափորոշիչներ կսահմանվեն
Հայաստանում նախատեսվում է միասնական չափորոշիչներ սահմանել ապաստարանների, հակաճառագայթային թաքստոցների և այլ պաշտպանական կառույցների պահպանության, սպասարկման, շահագործման ու պատրաստվածության ապահովման համար։ Համապատասխան որոշման նախագիծը հանրային քննարկման է ներկայացրել ՀՀ ներքին գործերի նախարարությունը։
Նախագծով սահմանվում է, որ ապաստարաններն ու հակաճառագայթային թաքստոցները պետք է ունենան առնվազն մեկ հիմնական և մեկ պահեստային ելք։ Մուտքերն ու ելքերը պետք է լինեն ազատ և չարգելափակված, իսկ տարածքը՝ մաքուր ու չոր։
Պաշտպանական կառույցները պետք է ապահովված լինեն օդափոխության, էլեկտրամատակարարման, ջրամատակարարման, ջեռուցման և ջրահեռացման համակարգերով, կապի հանգույցով, նստատեղերով, քնատեղերով, առաջին օգնության ու հրդեհաշիջման միջոցներով և տարրական սանիտարական պարագաներով։
Նախատեսվում է նաև պահեստային գեներատորի կամ մարտկոցի առկայություն՝ նվազագույնը 12 ժամ ինքնավար աշխատանքի հնարավորությամբ։ Խմելու ջրի նվազագույն պաշարը պետք է կազմի յուրաքանչյուր անձի համար օրական առնվազն 2 լիտր։
Ապաստարանները պետք է ունենան դրանց պահպանության, սպասարկման և պատրաստվածության բերման համար պատասխանատու անձ ու սպասարկող անձնակազմ։
Պաշտպանական կառույցները նախատեսված են արտակարգ իրավիճակների կամ դրանց սպառնալիքի ժամանակ մարդկանց պաշտպանելու օդային հարձակման հնարավոր միջոցների ազդեցությունից, ռադիոակտիվ, քիմիական և կենսաբանական թունավոր նյութերից, ինչպես նաև հրդեհների հետևանքով առաջացող բարձր ջերմաստիճանից։
Խաղաղ պայմաններում ապաստարանները կարող են օգտագործվել նաև տնտեսական և սպասարկման նպատակներով, սակայն այդ օգտագործումը պետք է համաձայնեցվի համայնքի ղեկավարի և բնակչության պաշտպանության ոլորտի լիազոր մարմնի հետ։
Պատրաստվածության բերման ժամանակ պետք է ստուգվեն դռների սարքինությունն ու հերմետիկությունը, տարածքը պետք է ազատվի կողմնակի իրերից, մաքրվի, ախտահանվի և օդափոխվի։ Ստուգման են ենթակա նաև կապի, էլեկտրամատակարարման, ջեռուցման, ջրամատակարարման, ջրահեռացման համակարգերը, առաջին օգնության և հրդեհաշիջման միջոցները։
Պաշտպանական կառույցների պատրաստվածությունը նախատեսվում է ստուգել ուսումնավարժությունների և վարժանքների միջոցով։
Նախագծի հիմնավորման համաձայն՝ գործող իրավական կարգավորումներում պաշտպանական կառույցների պահպանության, տեխնիկական սպասարկման, վերանորոգման, կահավորման և պատրաստվածության բերման գործընթացներն ամբողջությամբ համակարգված չեն։
Նախագծի ընդունմամբ ակնկալվում է բարձրացնել պաշտպանական կառույցների պատրաստվածության մակարդակը, բարելավել դրանց տեխնիկական վիճակի վերահսկողությունը և հստակեցնել պետական ու տեղական ինքնակառավարման մարմինների, սեփականատերերի և շահագործողների պարտականությունները։
Կարգավորումները չեն տարածվի ՀՀ պաշտպանության նախարարության պաշտպանական կառույցների վրա։
Որոշումն ուժի մեջ կմտնի 2027 թվականի հունվարի 1-ից։
