«Տատիկ-պապիկի» ցուցահանդեսից հանված նկարը՝ Արարատի գագաթին
Հայ հասարակության մեջ լայն արձագանք գտած միջադեպը ստացել է անսպասելի և խորհրդանշական շարունակություն։ Արցախցի 11-ամյա Եվա Դանիելյանի նկարը, որն ավելի վաղ հանվել էր Երևանի Ա. Տեր-Ղևոնդյանի անվան № 1 երաժշտական դպրոցում կազմակերպված ցուցահանդեսից, բարձրացվել է Արարատ լեռան գագաթը։ Այս խորհրդանշական քայլը նվիրված է հիշողության յուրաքանչյուր մարդու իրավունքին և այն արժեքներին, որոնք անհնար է նսեմացնել կամ ոչնչացնել որևէ արգելքով։
Վերելքի մասնակիցների խոսքով՝ իրենց նախաձեռնությունը պատասխան էր այն պատմությանը, որը մեծ արձագանք էր գտել Հայաստանում։
Հիշեցնենք, որ 11-ամյա Եվայի աշխատանքը, որը նվիրված էր Արցախ վերադառնալու գաղափարին, չէր թույլատրվել ցուցադրել դպրոցական ցուցահանդեսին։
«Հիշողությունն անհնար է ջնջել,- ասել է վերելքի մասնակիցներից մեկը։ -Մենք ցանկանում էինք աջակցություն հայտնել Եվային և ցույց տալ, որ արդարությունն ու բարությունը վեր են ամեն ինչից, և, որ ամենակարևոր արժեքներն անհնար է արգելել»։
Մասնակիցները նաև կոչ են արել պատանի նկարչուհուն շարունակել ստեղծագործել, նկարել և երբեք չվախենալ արվեստի միջոցով ազատորեն արտահայտվելուց։
«Երևանում գտնվելու առաջին իսկ օրվանից, երբ տպագրեցինք այս նկարի կրկնօրինակը, մենք զգացել ենք մարդկանց անվերապահ աջակցությունը՝ ինչպես Եվայի, այնպես էլ՝ մեր նախաձեռնության հասցեին»,- ասել են նրանք։
Արարատի գագաթը բարձրացված նկարը դարձավ խորհրդանիշ այն բանի, որ գոյություն ունեն արժեքներ, որոնք բարձր են ցանկացած արգելքից։ Դրանք են հիշողությունը, սերը հայրենի հողի հանդեպ և ստեղծագործելու ազատությունը։
Ակցիայի կազմակերպիչներն ընդգծում են, որ այս պատմությունը պետք է հիշեցնի, որ ստեղծագործական ինքնարտահայտման ազատությունը չի կարող սահմանափակվել որևէ գաղափարախոսության շահերից ելնելով։
Ակցիայի կազմակերպիչները հայտարարել են, որ տեղի ունեցածը դիտարկում են նաև որպես առիթ՝ հասարակության մեջ ավելի լայն քննարկում սկսելու ստեղծագործական ազատ ինքնարտահայտման իրավունքի շուրջ։
«Այստեղ՝ Արարատի գագաթին, մենք ոչ մի կասկած չունենք, թե որ նկարն էր կրում գլխավոր գաղափարն ու ամենակարևոր իմաստն այդ ցուցահանդեսում»,- ընդգծել են նրանք։
