Իրանն ու Ադրբեջանը ստեղծում են պաշտպանական հանձնաժողով
![](https://168.am/wp-content/uploads/2015/04/91947_src.jpg)
Haqqin.az պորտալի փոխանցմամբ՝ Իրանի պաշտպանության նախարար Հոսեին Դեհգհանի այցն էլ ավելի կամրապնդի Իրանի ու Ադրբեջանի միջև ռազմավարական համագործակցությունը՝ հաշվի առնելով երկու երկրների միջև հարաբերությունների բարձր մակարդակը:
Այս մասին Դեհգհանի ադրբեջանական այցին նվիրված մամուլի ասուլիսի ժամանակ հայտարարել է Ադրբեջանում Իրանի դեսպան Մոհսեն Փակ Այինը: Դեսպանն ընդգծել է, որ այցի հիմնական կողմը դարձել է պաշտպանական ոլորտում համատեղ հանձնաժողով ձևավորելու մասին որոշումը.
«Այն ղեկավարելու են Իրանի ու Ադրբեջանի պաշտպանության նախարարները: Հանձնաժողովի հիմնական գործառույթը լինելու է պաշտպանական ոլորտում երկու երկրների միջև առաջարկների քննարկումը»: Դեսպանի խոսքերով՝ Դեհգհանի ադրբեջանական այցի երկրորդ կարևոր կողմն անվտանգության հարցերի քննարկումն է.
«Քննարկվել է ահաբեկչական կազմակերպությունների դեմ պայքարը, ինչպիսին է «Իսլամական պետությունը»: Որոշվել է պայմաններ ստեղծել արմատականության դեմ պայքարում համատեղ քայլեր ձեռնարկելու համար»: Դեհգհանն Ադրբեջան է այցելել այդ երկրի պաշտպանության նախարար Զաքիր Հասանովի հրավերով: