Քանդակագործը զայրացել է՝ լսելով, թե ով է Մարզահամերգային համալիրի հնարավոր գնորդը
«Համալիրն իմ էությունն է: Գիտե՞ք ինչ հզոր բան է լինել հեղինակ: Դա քո երեխան է»,- 168.am-ի հետ զրույցում ասաց Ֆերդինանտ Առաքելյանը, որը Կարեն Դեմիրճյանի անվան մարզահամերգային համալիրի ճակատային մասի քանդակագործն է: «Մենք (երեք ճարտարապետները և ես) ապրել ենք այդ կառույցով: Ամեն քարը դժվարությամբ բերել եմ հանքից, կտրել, շարել, տաշել: Շինել ենք արվեստ»:
Քանդակագործը նշեց, որ համալիրը կառուցվել է շատ բարդ ճանապարհով. «Իհարկե, մեծ դերակատարում ուներ Դեմիրճյանը: Երկրորդ կարծիքը չկա: Հիմա վաճառել են այդ համալիրը»:
Ֆ. Առաքելյանը նշեց, որ առաջին անգամ, երբ վաճառեցին համալիրը, ինքն ուրախացել էր. «Ասեցի՝տեր կլինի, այս երկիրը ի վիճակի չէ այդպիսի կառույց պահպանել: Այդպիսի կառույցները երկրներն են պահում` մեծ թատրոնը, Էրմիտաժը: Պատմամշակութային բոլոր կառույցները պետությունն է պահում ռոտացիայով: Մեր երկիրը դրան էլ պատրաստ չէր, վաճառեցին, Աստված իրենց հետ: Ու գնեցին «ԲԱՄՕ»-ի տղաները: Շատ լավ կառուցեցին: Ես հիացել էին նրանցով: Հետո տեղի ունեցավ այն, որ իրենք վարկ էին վերցրել և չեն կարողանում վարկը փակել, ինչի պատճառով կառույցը ծախում են: Գնորդ է հայտնվել, Աստված ձեզ հետ, բայց թող լրացնեն մեր պահանջը, որ ոչինչ չի փոխվելու` սկսած անունից: Հիմա մենք հասնում ենք նրան, որ այդպես լինի»:
Նա հիշեցրեց, որ Երիտասարդության պալատի գնորդը քանդել էր շենքը` ասելով` «Ինձ ցույց տվեք պայմանագրի մեջ մի կետ, որն ասում է՝ իրավունք չունեմ քանդել». «Հիմա այս դեպքում էլ մի գնորդ կարող է գալ ու ասել` «Դեմիրճյանի անունն ինձ դուր չի գալիս, աթոռն ինձ դուր չի գալիս, դուռն ինձ դուր չի գալիս», ու սկսի քանդել, մի օր էլ իմանաս՝ մեջը ավտոշուկա է կառուցվել: Հրաշալի ավտոշուկա կլինի: Մյունխենի ավտոշուկայի սալոնը սրա մոտ հեչ բան է: Ո՞վ կպատկերացներ, որ «Ռոսիա» կինոթատրոնըքըրչ ու փալասի խանութ կարող է դառնար»:
Խոսելով հավանական գնորդի մասին` Ֆ. Առաքելյանն ասաց, որ մոտավոր պատկերացնում է, թե ով կարող է լինել. «Իմ ականջն ընկել է, որ դրսից է առնողը և աղանդավորներ են: Դա ինձ ընդհանրապես զայրացրեց: Կարող է ակումբ սարքեն, խանութ սարքեն, ամեն ինչ կարող են սարքել»:
