Մոսկվայում տեղի է ունեցել ԵԱՀԿ Մինսկի խմբի համանախագահների ու Գրիգորի Կարասինի հանդիպումը
ՌԴ ԱԳՆ-ի պաշտոնական կայքի փոխանցմամբ՝ Ռուսաստանի փոխարտգործնախարար Գրիգորի Կարասինը երեկ Մոսկվայում հանդիպել է ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ժակ Ֆորի (Ֆրանսիա), Ջեյմս Ուորլիքի (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ:
Հանդիպման ժամանակ կողմերը քննարկել են Ղարաբաղյան հակամարտության կարգավորմանն առնչվող այժմեական հարցեր: Ավելի ուշ Ջեյմս Ուորլիքը Twitter-ի իր էջում գրել է, որ Մոսկվայում անցկացված խորհրդակցությունները եղել են կառուցողական: Կարասինից առաջ էլ ԵԱՀԿ Մինսկի խումբը Մոսկվայում հանդիպել էր Հայաստանի արտգործնախարար Էդվարդ Նալբանդյանի հետ:
