Ջոն Քերին դիվանագիտական վերջնագիր է ներկայացրել Սերգեյ Լավրովին
Ամերիկյան CNN հեռուստաալիքի փոխանցմամբ` ԱՄՆ պետքարտուղար Ջոն Քերին երեկ հեռախոսազրույց է ունեցել Ռուսաստանի արտգործնախարար Սերգեյ Լավրովի հետ, որի ժամանակ նրան զգուշացրել է Ուկրաինայում առկա ճգնաժամի կարգավորման համար դիվանագիտական ուղիների սպառման հնարավորության մասին, եթե Ռուսաստանը շարունակի ընդլայնել իր ռազմական ներկայությունը Ղրիմում և Ուկրաինայի այլ շրջաններում:
Քերիի խոսքերով` Ղրիմը միացնելու ուղղությամբ Ռուսաստանի հետագա քայլերը որևէ տեղ չեն թողնի դիվանագիտության համար: Պետքարտուղարը նաև Մոսկվային առավելագույն զսպվածության կոչ է արել:
Ռուսաստանի ԱԳՆ-ի հաղորդմամբ` հեռախոսազրույցի ժամանակ Քերին ու Լավրովը պայմանավորվել են շարունակել ինտենսիվ շփումները` ուկրաինական ճգնաժամի կարգավորմանն աջակցելու նպատակով: Որևէ այլ մանրամասներ չեն հաղորդվել:
