Ինտերպոլն Ուկրաինայից ստացել է Յանուկովիչին կալանքի տակ առնելու մասին դիմումը
France-Presse լրատվական գործակալության փոխանցմամբ՝ Ինտերպոլն Ուկրաինայի իրավապահ մարմիններից ստացել է նախկին նախագահ Վիկտոր Յանուկովիչի նկատմամբ միջպետական հետախուզում հայտարարելու ու նրան կալանքի տակ վերցնելու մասին դիմումը:
Այս մասին այսօր հայտարարել է Քրեական ոստիկանության միջազգային կազմակերպությունը: Ուկրաինայից ստացված դիմումի նկատմամբ որոշում կայացվելու դեպքում Ինտերպոլի անդամ բոլոր երկրներն անհապաղ կիրազեկվեն Յանուկովիչի նկատմամբ միջպետական հետախուզման հայտարարման մասին:
Ռուսաստանը, որի տարածքում գտնվում է Յանուկովիչը, հանդիսանում է Ինտերպոլի անդամ: Չնայած դրան՝ Ինտերպոլը հայտարարել է, որ չի կարող իր անդամ երկրներին պարտադրել՝ կատարելու համար միջպետական հետախուզման մեջ գտնվող անձանց կալանքի տակ առնելու մասին պահանջը:
Ռուսական ԶԼՄ-ները հայտնել են, որ Յանուկովիչը ներկայումս գտնվում է առողջական ծանր վիճակում, նա ստացել է սրտի կաթված:
