Անտեսվել է Ուկրաինայի հարավի ու արևելքի մտահոգությունը. Սերգեյ Լավրով
Ռուսական РИА Новости լրատվական գործակալության փոխանցմամբ՝ Ռուսաստանի արտգործնախարար Սերգեյ Լավրովը Ժնևում արևմտյան գործընկերներին կոչ է արել Ուկրաինայի հարցում մի կողմ դնել աշխարհաքաղաքական հաշվարկները և հաշվի առնել Ուկրաինայի ժողովրդի շահերը.
«Նրանք, ովքեր փորձում են իրավիճակը ներկայացնել որպես ագրեսիա, սպառնում են ամեն հնարավոր պատժամիջոցներով ու բոյկոտներով: Նրանք մեր նույն գործընկերներն են, որոնք հետևողականորեն ու համառորեն խրախուսել են իրենց մոտ կանգնած քաղաքական ուժերին՝ ներկայացնելու վերջնագիր և հրաժարվելու երկխոսությունից:
Անտեսվել է Ուկրաինայի հարավի ու արևելքի մտահոգությունը, ինչը վերջին հաշվով հանգեցրել է ուկրաինական հասարակության բևեռացմանը: Կոչ ենք անում ցուցաբերել պատասխանատու մոտեցում, մի կողմ դնել աշխարհաքաղաքական հաշվարկները և ավելի վեր դասել Ուկրաինայի ժողովրդի շահերը: Անհրաժեշտ է ապահովել փետրվարի 21-ի համաձայնագրով ստանձնած պարտավորությունների իրագործումը»:
