Միասնական արժույթի մասին խոսակցություններ չկա՞ն
Մաքսային միության սահմաններում միասնական արժույթի անցնելու խոսակցություններ նույնիսկ սաղմնային վիճակում չկան: Այսօր հրավիրված ասուլիսում հավաստիացրեց ՀՀ կենտրոնական բանկի խորհրդի անդամ, Դրամավարկային և արժութային հարցերով աշխատանքային խմբի ղեկավար Արթուր Ստեփանյանը:
Ըստ նրա՝ քանի որ երկրները պատրաստակամություն են հայտնում միասնական տարածք ստեղծել, ապա արժութային քաղաքականությունը ևս պետք է համաձայնեցված տեսք ունենա, և նախատեսվում է արժութային օրենսդրությունը հարմոնիզացնել:
Ա.Ստեփանյանի խոսքով՝ ՄՄ տարածքում արժութային քաղաքականությունների ազատականացում է լինելու, ժամանակի ընթացքում սահմանափակումները պետք է վերացվեն, սակայն ՀՀ-ում դեռ 1990-ականներից չեն գործում նման սահմանափակումներ, և մեր երկիրը շահեկան վիճակում է: Ա.Ստեփանյանը նշեց, որ Կենտրոնական բանկերի անկախությունը պաշտպանվելու է՝ որպես քաղաքականության իրականացնողներ, մասնավորապես՝ ՌԴ ԿԲ-ն նույնպես անցնելու է գնաճային նպատակադրման քաղաքականության: «Մեր կյանքում դրամավարկային քաղաքականության հարմոնիզացիայի որևէ խնդիր ՀՀ-ն չունի»,- ասաց նա:
