Սաակաշվիլին վրացի գործարարներին խնդրել է ֆինանսավորել նախագահական գրադարանի կառուցումը
Ռուսական РИА Новости լրատվական գործակալության փոխանցմամբ՝ Վրաստանի նախագահ Միխեիլ Սաակաշվիլին դիմել է վրացի գործարարներին՝ խնդրելով ֆինանսավորել նախագահական գրադարանի կառուցումը:
Այս մասին նշված է Facebook սոցցանցում Սաակաշվիլիի պաշտոնական էջում: Ավելի վաղ Սաակաշվիլին հայտարարել է, որ իր նախագահական լիազորությունների սպառվելու ժամանակ պլանավորում է բացել նախագահական ժամանակակից գրադարան, որը նախատեսված է լինելու երիտասարդ սերնդի համար և պարունակելու է Վրաստանի ղեկավարի կառավարման պատմության վերաբերյալ բազմաթիվ նյութեր:
Սաակաշվիլիի խոսքերով՝ նախագահական գրադարանի կառուցումն արժենալու է մի քանի հարյուր հազար դոլար: Նա ընդգծել է, որ իր նախագահության ընթացքում ոչ մի անգամ գործարարներից փող չի վերցրել, և այժմ նույնպես չունի դրա ցանկությունը:
Սաակաշվիլին պարզապես ցանկանում է, որ գործարարները ֆինանսավորեն նախագահական գրադարանի կառուցումը:
Վրաստանում նախագահական ընտրություններն անցկացվելու են հոկտեմբերի 27-ին:
