Րաֆֆի Հովհաննիսյանի հանդիպումները դիվանագետների հետ
Այսօր Րաֆֆի Հովհաննիսյանն ընդունեց Ֆինլանդիայի արտաքին գործերի նախարարության պատվիրակությանը, որի կազմում էին այդ երկրի արտաքին քաղաքական գերատեսչության՝ Ռուսաստանի, Արեւմուտքի եւ Կենտրոնական Ասիայի վարչության գլխավոր տնօրեն Թերհի Հակալան, ՀՀ-ում Ֆինլանդիայի Հանրապետության արտակարգ եւ լիազոր դեսպան Քրիստեր Միքելսոնը եւ պաշտոնատար այլ անձինք:
Ֆին դիվանագետների խնդրանքով Հովհաննիսյանն անդրադարձավ Հայաստանի ներքին եւ արտաքին քաղաքականության առանցքային դիտանկյուններին, ինչպես նաեւ տարածաշրջանային զարգացումներին առնչվող մի շարք խնդիրների:
Նույն օրը Րաֆֆի Հովհաննիսյանը հանդիպում ունեցավ Հայաստանում Լիտվայի նորանշանակ դեսպան Էրիկաս Պետրիկասին: Արծարծվեցին երկուստեք հետաքրքրություն ներկայացնող հարցեր:
«Ժառանգություն» կուսակցության լրատվական ծառայություն
