ՀՀ-ում ՌԴ դեսպանատունն անհարմար դրության մեջ է դրել ոստիկանությանը. մամուլ
«ՀՀ-ում ՌԴ դեսպանատունը երեկ տարածած հայտարարությամբ, մեղմ ասած, անհարմար դրության մեջ է դրել ոստիկանությանը»,- գրում է «Ժողովուրդ» օրաթերթն ու հավելում.
«Բանն այն է, որ ոստիկանությունը ՌԴ դեսպանատան մոտ օգոստոսի 17-ի միջադեպի մասին տեղեկատվություն էր տարածել, թե «մի խումբ քաղաքացիներ փորձել են մուտք գործել ՌԴ դեսպանատան հատուկ պահպանվող տարածք, վիճաբանության մեջ մտել տարածքում պահպանության ծառայություն իրականացնող աշխատակիցների հետ՝ չենթարկվելով վերջիններիս օրինական պահանջներին»:
Այնինչ ՀՀ-ում ՌԴ դեսպանատունը հակառակն է պնդել՝ ասելով, որ իրենց աշխատակիցները որևէ առնչություն չունեն դեսպանատան մոտ տեղի ունեցած միջադեպին: «Տեղեկությունները, որ որոշ անձինք փորձել են ապօրինաբար մուտք գործել ՌԴ դեսպանատան տարածք կամ ինչ-որ առարկա (առարկաներ) նետել դեսպանատան ուղղությամբ, չեն համապատասխանում իրականությանը»,- ասված է դեսպանատան հայտարարության մեջ»:
