Վրաստանում բանտապահներին արգելել են հաճախել խաղատներ
Грузия Online-ի փոխանցմամբ՝ Վրաստանի պատիժների իրագործման նախարարության աշխատակիցներին արգելել են հաճախել խաղատներ: Համապատասխան հավելումն արվել է տվյալ գերատեսչության էթիկայի օրենսգրքում:
Քրեակատարողական համակարգի աշխատակիցների համար էթիկայի օրենսգիրքն ընդունվել է 2010 թվականին: Այն արգելում է ծեծել բանտարկյալներին, գտնվել ալկոհոլի կամ ուժեղ ներգործություն ունեցող այլ բանի ազդեցության ներքո, ինչպես նաև աշխատանքի համատեղություն:
Նախորդ տարվա հոկտեմբերի 1-ին Վրաստանում անցկացված խորհրդարանական ընտրությունների արդյունքներով երկրի վարչապետ դարձած Բիձինա Իվանիշվիլին հանդես էր եկել խաղատների սահմանափակման կամ ընդհանրապես արգելման օգտին:
Իվանիշվիլին մասնավորապես հայտարարել էր, որ մտադիր է փակել Բաթումի բոլոր խաղատները, քանի որ դրանք խաթարում են երկրի հեղինակությունը:
