ԵՄ-ը «Հզբոլլահի» մասին որոշումն ընդունել է ԱՄՆ-ի ու Իսրայելի ճնշման ներքո. Հասան Նասրալլահ
Ռուսական ИТАР-ТАСС լրատվական գործակալության փոխանցմամբ՝ լիբանանյան «Հզբոլլահ» շարժման առաջնորդ Հասան Նասրալլահը մեկնաբանել է ԵՄ-ի կողմից «Հզբոլլահի» ռազմական թևն ահաբեկչական կազմակերպությունների ցուցակում ներառելը.
«ԵՄ-ի այդ որոշումն ինքնուրույն չէ և ընդունվել է ԱՄՆ-ի ու Իսրայելի ճնշման ներքո: Դուք (եվրոպացի նախարարներդ) ոչնչի չեք հասնի այդ քայլով, ձեզ սպասում է ձախողում և հիասթափություն:
«Հզբոլլահի» անդամներն իրենց հանգիստը չեն անցկացնում Սարդինիայում և հաշվեհամարներ չունեն եվրոպական բանկերում: Այդ պատճառով էլ ԵՄ-ի պատժամիջոցները բացարձակապես անօգուտ են:
Այսուհետ «Հզբոլլահը» եվրոպացիներին համարելու է Լիբանանի դեմ իսրայելական յուրաքանչյուր ագրեսիվ ակցիայի հանցակից»:
Հիշեցնենք, որ Իսրայելը դժգոհ էր մնացել ԵՄ-ի վերոնշյալ որոշումից, որ «Հզբոլլահի» միայն ռազմական թևն էր ճանաչվել ահաբեկչական և ոչ թե ողջ շարժումը:
