Ռուսաստանը կանի անհրաժեշտ ամեն բան իր անվտանգության ապահովման համար. Պեսկով
Ռուսաստանը չի կարող ՆԱՏՕ-ին թույլ տալ զորակազմ տեղակայել Ուկրաինայում և կանի անհրաժեշտ ամեն բան իր անվտանգության ապահովման համար: Ինչպես տեղեկանում ենք ՏԱՍՍ գործակալությունից, այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը:
«ՆԱՏՕ-ի փորձը՝ ներթափանցելու Ուկրաինա, վտանգ է ներկայացնում մեր երկրի համար: Ուստի մենք վտանգ ենք համարում օտարերկրյա զինված ուժերի, ՆԱՏՕ-ի զինված ուժերի ներկայությունն ուկրաինական հողում՝ մեր սահմանների մոտ, – ասել է նա:
– Դա վտանգ է մեզ համար, որովհետև ՆԱՏՕ-ն Ռուսաստանին թշնամի է համարում, դա արտացոլված է նրանց փաստաթղթերում: Մենք չենք կարող դա թույլ տալ: Եվ մենք կանենք անհրաժեշտ ամեն բան մեր անվտանգության ապահովման համար»:
Կրեմլի ներկայացուցիչն ընդգծել է, որ «չի կարելի ապահովել մի երկրի անվտանգությունը՝ սպառնալիք ստեղծելով մյուսի համար»:
«Այնպես որ, մեր ըմբռնումով դա չի օգնի մոտենալու հակամարտության լուծմանը», – հավելել է նա՝ պատասխանելով հարցերին Վլադիվոստոկում անցկացվող Արևելյան տնտեսական համաժողովի շրջանակներում:
