Վրաստանի նախկին վարչապետը հայտնել է, որ իր դեմ հարձակումը պատվիրել է Իվանիշվիլին
Վրաստանի նախկին վարչապետ, «Հանուն Վրաստանի» ընդդիմադիր կուսակցության առաջնորդ Գեորգի Գախարիան կարծում է, որ իր վրա հարձակումը նախապես ծրագրված էր «Վրացական երազանք» կուսակցության պատվավոր նախագահ, օլիգարխ Բիձինա Իվանիշվիլու հանձնարարությամբ։ Այս մասին գրել է NewsGeorgia-ն՝ հղում կատարելով նրա հայտարարությանը։
Գախարիան ասել է, որ դա «նախապես կազմակերպված քաղաքական հաշվեհարդար էր»։
«Հարձակումը պատվիրել է Բիձինա Իվանիշվիլին։ Իվանիշվիլին երկար ժամանակ սպառնում է ինձ եւ իմ ընտանիքին տարբեր ձեւերով, այդ թվում՝ հրապարակայնորեն»,- ասել է նա։
Վրաստանի նախկին վարչապետն ընդգծել է, որ «իրեն չեն հետաքրքրում կատարողները»։
«Ես գործ ունեմ մի մարդու հետ, որը պատվիրել է հարձակվել իմ վրա եւ բռնություն կատարել քաղաքացիների նկատմամբ։
Ինչ վերաբերում է հետաքննությանը, մենք նրանց հնարավորություն ենք տալիս փրկել իրենց դեմքը եւ չդառնալ բռնի հանցագործությունների մեղսակից»,- ընդգծել է նա։
Նախկին վարչապետը դատախազությունում հարցաքննվելուց հետո հայտարարություն է տարածել։ Քննիչները նրան պաշտոնապես տուժող են ճանաչել։
Հիշեցնենք, որ հարձակումը տեղի է ունեցել հունվարի 14-ի գիշերը Բաթումի «Շերատոն» հյուրանոցի նախասրահում։ Միջադեպին նախորդող հանգամանքները, ինչպես նաեւ միջոցառումների մասնակիցների թիվը չի հաղորդվում։ Այնուհետեւ հիվանդանոցում Գախարիայի մոտ ախտորոշվել է քթի կոտրվածք եւ ուղեղի ցնցում։
Ըստ ականատեսների՝ ծեծի մասնակիցների թվում տեսել են «Ժողովրդի ուժի» պատգամավորի՝ Դմիտրի Սամխարաձեին, որը իշխանության մեջ գտնվող կուսակցության արբանյակն է, եւ իշխանության կուսակցությունից Աջարիայի Գերագույն խորհրդի անդամ Գեորգի Մանվելիձեին։
