Մոդին մտադիր է փետրվարին այցելել Փարիզ. The Hindu
Հնդկաստանի վարչապետ Նարենդրա Մոդին ծրագրում է փետրվարին այցելել Ֆրանսիա։ Ինչպես հաղորդում է The Hindu թերթը՝ վկայակոչելով աղբյուրներ, Փարիզում կարող են գործարքներ կնքվել Հնդկաստանի ռազմածովային ուժերի համար Rafale կործանիչների և Scorpene սուզանավերի ձեռքբերման վերաբերյալ։
«Սպասվում է, որ վարչապետ Մոդին կայցելի Փարիզ՝ մասնակցելու արհեստական բանականության գագաթնաժողովին։ Այցը կունենա նաև երկկողմանի բաղադրիչ. Կողմերն աշխատում են երկու գործարք կնքելու ուղղությամբ, որոնք քննարկման վերջնական փուլում են»,- ասել է աղբյուրը։ Հնդկաստանի կառավարության ղեկավարը հրավեր է ստացել մասնակցելու գագաթնաժողովին, որը կանցկացվի Ֆրանսիայում փետրվարի 10-ին և 11-ին։
Փարիզն ու Նյու Դելին ամիսներ շարունակ քննարկում էին ավելի քան 10 միլիարդ դոլար արժողությամբ գործարք հնդկական ռազմածովային ուժերի համար Rafale-M կործանիչներ և Scorpene դասի սուզանավեր գնելու վերաբերյալ: Ակնկալվում է, որ այս պայմանագրերը կներկայացվեն Հնդկաստանի կառավարության համապատասխան կոմիտեին՝ հաստատման համար առաջիկա մի քանի շաբաթվա ընթացքում, ասել են աղբյուրները:
