«Մերձավորարևելյան քառյակը» շուտով կվերսկսի Սիրիայի վերաբերյալ բանակցությունները. Իրանի ԱԳՆ
Իրանական Mehr լրատվական գործակալության փոխանցմամբ՝ Իրանի՝ արաբա-աֆրիկյան հարցերով փոխարտգործնախարար Հոսեին Ամիր Աբդոլահիանը հայտարարել է, որ մոտ ժամանակներս կվերսկսվեն Սիրիայի վերաբերյալ Իրանի, Թուրքիայի, Եգիպտոսի ու Սաուդյան Արաբիայի միջև բանակցությունները:
Աբդոլահիանն ընդգծել է, որ ամենայն հավանականությամբ ձախողվել է Սիրիայի գործերին արտաքին ռազմական միջամտության փորձը՝ հավելելով, որ տվյալ խնդրի լուծման եղանակը դիվանագիտությունն է:
Իրանցի դիվանագետը հիշեցրել է, որ ոչ վաղ անցյալում կատարած եգիպտական այցի ժամանակ հանդիպել է այդ երկրի նախագահ Մուհամեդ Մուրսիի հետ և հանդես է եկել Սիրիայի շուրջ բանակցությունները վերսկսելու նախաձեռնությամբ:
Նախորդ տարի Իրանի, Թուրքիայի ու Եգիպտոսի դիվանագետներից բաղկացած «շփման խումբը» անցկացրել է հանդիպում՝ սիրիական ճգնաժամը քննարկելու համար: Սաուդյան Արաբիայի բարձրաստիճան ներկայացուցիչները չեն միացել այդ հանդիպմանը:
