Լիբանանը մարդասիրական նոր օգնության խնդրանք չի ներկայացրել ՌԴ-ին
Լիբանանի իշխանությունների կողմից ՌԴ-ին ոչ մի նոր խնդրանք չի ներկայացվել՝ պարենային անվտանգության ապահովման համար շտապ մարդասիրական օգնություն տրամադրելու հարցով։ Այդ մասին ասել է Լիբանանում Ռուսաստանի դեսպան Ալեքսանդր Ռուդակովը։
Ռուսական դիվանագիտական առաքելության ղեկավարն ընդգծել է, որ Լիբանանը շարունակում է հացահատիկ (այդ թվում՝ Ռուսաստանից), ինչպես նաև այլ պարենային ապրանքներ գնել կոմերցիոն հիմունքներով։
«Լիբանանի կառավարության կողմից երկրում պարենային անվտանգությունն ապահովելու համար շտապ մարդասիրական օգնության խնդրանքներ չեն եղել»,- ասել է Ռուդակովը։
Լիբանանի խորհրդարանը 2022 թվականի աշնանից ի վեր 12 անարդյունք նիստ է անցկացրել՝ փորձելով նախագահ ընտրել։ Հանրապետության նախկին նախագահ Միշել Աունը հրաժարական տվեց 2022 թվականի հոկտեմբերի վերջին՝ վեց տարի իշխանությունից հետո՝ չնայած իրավահաջորդի բացակայությանը։
Վերջին մի քանի տարիների ընթացքում Լիբանանը գտնվում է ֆինանսական և տնտեսական խորը ճգնաժամի մեջ, որն ուղեկցվում է քաղաքական և սոցիալական լարվածությամբ։ Ճգնաժամի ֆոնին բանկային համակարգը գրեթե ամբողջությամբ կաթվածահար եղավ, ազգային արժույթը դոլարի նկատմամբ արժեզրկվեց ավելի քան 20 անգամ։ Դրա հետևանքով բնակչության ավելի քան 70%-ը հայտնվել է աղքատության շեմից ցածր պայմաններում։
