Չինաստանում պարզել են, որ քաշ կորցնելն օգնել է հիվանդների միայն 6%-ին՝ ազատվելու 2-րդ տիպի շաքարախտից
Չինացի բժիշկները պարզել են, որ ավելորդ քաշի կորուստը թույլ է տալիս նվազագույն թվով հիվանդների՝ ընդհանուրի մոտ 6%-ին, լիովին ապաքինվել 2-րդ տիպի շաքարախտից։ Գիտնականների եզրակացությունները հրապարակվել են PLoS Medicine գիտական ամսագրում հրապարակված հոդվածում:
«Քաշը կորցնելը օգնել է հիվանդների միայն 6%-ին ազատվել դիաբետից՝ ախտորոշումից հետո առաջին ութ տարում, իսկ նրանց կեսի մոտ կրկին զարգանում էր հիպերգլիկեմիա՝ ռեմիսիայից երեք տարի անց: Այս ամենը խոսում է այն մասին, որ ավելորդ քաշ կորցնելը շատ հազվադեպ է օգնում ազատվել դիաբետից»,- ըստ shantnews-ի՝ ասել է Հոնկոնգի չինական համալսարանի պրոֆեսոր Անդրեա Լուկը, որին մեջբերում է ամսագիրը։
Պրոֆեսոր Լուկը և այլ բժիշկներ եկել են այս եզրակացության՝ վերլուծելով RAMP-DM մոնիտորինգի ծրագրի շրջանակներում հավաքված տվյալները, որոնք ուղղված են 2-րդ տիպի շաքարախտի զարգացման հետ կապված ռիսկի գործոնների և բարդությունների ուսումնասիրմանը: Դրա աշխատանքներին մասնակցել են Հոնկոնգի ավելի քան 37 հազար բնակիչներ։
Վերջին տասնամյակների ընթացքում գիտնականները բազմաթիվ ապացույցներ են գտել, որ ավելորդ քաշը 2-րդ տիպի շաքարախտի հիմնական պատճառներից մեկն է: Կենսաբանների վերջին փորձերը մկների և այլ կենդանիների վրա ցույց են տալիս, որ ընդհատվող ծոմապահությունը զգալիորեն նվազեցնում է շաքարախտի և գիրության զարգացման հավանականությունը: Այս բացահայտումները մեծ հետաքրքրություն են առաջացրել շաքարախտի դիետիկ բուժման նկատմամբ:
