Բելգիան Ուկրաինային կփոխանցի ՌԴ-ի սառեցված ակտիվների եկամուտներից ստացված 1,7 մլրդ եվրոյի հարկերը
Բելգիան Ուկրաինային կփոխանցի 1,7 միլիարդ եվրո, որն ստացվել է ռուսական սառեցված ակտիվների վերաներդրումների եկամուտների հարկերից։ «Արմենպրես»-ի փոխանցմամբ՝ այդ մասին հայտնել է Բելգիայի վարչապետ Ալեքսանդր դե Կրոն Բրյուսելում Ուկրաինայի նախագահ Վլադիմիր Զելենսկիի հետ հանդիպման արդյունքներին նվիրված մամուլի ասուլիսում։
«Կան Ռուսաստանի սառեցված միջոցներ, կան եկամուտներ այդ միջոցներից: Բայց թե՛ առաջինը, թե՛ երկրորդը Եվրամիության իրավասությունն են: Իսկ մենք կարող ենք Ուկրաինային փոխանցել այդ եկամուտներից հարկերի տեսքով ստացված միջոցները, դա 1,7 միլիարդ եվրո է, որը պետք է օգտագործվի Ուկրաինայի պաշտպանության և վերականգնման համար», – նրա խոսքերն է մեջբերում ՏԱՍՍ գործակալությունը։
Լրագրողների այն հարցին, թե հատկապես Ռուսաստանի Դաշնության որքան ակտիվներ են սառեցված Բելգիայում, վարչապետը չի կարողացել պատասխանել։
«Մենք դրանց նկատմամբ հասանելիություն չունենք: Դրանք սառեցված են: Մենք չենք կարող հասանելիություն ունենալ դրանց նկատմամբ, քանի դեռ կան եվրոպական կանոններ: 2024 թվականին սառեցված ակտիվներից եկամուտների հարկերը կկազմեն մոտ 1,7 միլիարդ եվրո, դրանք չեն գնա մեր գանձարան, այլ ուղղակիորեն կփոխանցվեն Ուկրաինային», – հավելել է նա։
Ավելի վաղ ԱՄՆ ֆինանսների նախարարը հայտարարել էր, որ Վաշինգտոնը և նրա դաշնակիցները դիտարկում են հակամարտությունից հետո ռուսական սուվերեն ակտիվներն Ուկրաինայի վերականգնման համար օգտագործելու հնարավորությունը։ ՌԴ նախագահի մամուլի խոսնակ Դմիտրի Պեսկովը հայտարարել էր, որ Ռուսաստանը կպաշտպանի իր շահերը։
