«ՌԴ նախագահի մուտքը Հայաստան, իհարկե, դժվար է արգելել, բայց կասկած սերմանել, որ դա առհասարակ իրագործելի է, այն է, ինչ տեղի ունեցավ Հռոմի ստատուտի վավերացման արդյունքում». Զատուլին

ՌԴ Պետդումայի պատգամավոր Կոնստանտին Զատուլինը կարծում է, որ Հայաստանն արգելել է Պուտինի մուտքը երկիր:

Հայաստանի խորհրդարանի կողմից Հռոմի կանոնադրության վավերացումը փաստացի նշանակում է Ռուսաստանի նախագահ Վլադիմիր Պուտինի մուտքի՝ այս երկիր արգելք։

Այս մասին Gazeta.Ru-ին ասել է Պետդումայի ԱՊՀ հարցերով կոմիտեի ղեկավարի առաջին տեղակալ, պատգամավոր Կոնստանտին Զատուլինը։ Հարցազրույցը հրապարակվել է Զատուլինի պաշտոնական կայքում:

«Հայկական կողմը փորձում է նսեմացնել Հռոմի ստատուտի վավերացման նշանակությունը։ Նա պնդում է, որ չի պատրաստվում դա կիրառել Ռուսաստանի պետական ​​պաշտոնյաների նկատմամբ։ Մյուս կողմից՝ մենք պաշտոնապես դատապարտեցինք այս վավերացումը՝ որպես ոչ բարեկամական արարք։ Առաջիկայում Ռուսաստանի Դաշնության նախագահի՝ Հայաստան մեկնելու հեռանկար՝ վավերացումով կամ առանց վավերացման, չեմ տեսնում: Տվյալ դեպքում հայկական կողմը չի կարող չհասկանալ, որ նման գործողությունն իրականում նշանակում է ՌԴ նախագահի մուտքի՝ Հայաստան արգելք։ Այս առումով Փաշինյանը և իր գործընկերները հետևողական են: Անցյալ տարի նրանք սկսեցին «մարզվել» ռուս քաղաքական և հասարակական գործիչների վրա»,- ասել է Զատուլինը:

Պատգամավորը հիշեցրել է, որ Հայաստանն արդեն արգելել է իր, Մարգարիտա Սիմոնյանի, Արամ Գաբրիելյանովի, ինչպես նաև «մի շարք այլ անձանց» մուտքը երկիր։

«Ռուսաստանի նախագահի մուտքը Հայաստան, իհարկե, դժվար է արգելել, բայց հարցականի տակ դնել, կասկած սերմանել, որ դա առհասարակ իրագործելի է, սա այն է, ինչ տեղի ունեցավ վավերացման արդյունքում»,- նշել է Զատուլինը։

Հրապարակման պատրաստեց 168.am-ը