Լուիս Բոնոն քննարկել է «Լեռնային Ղարաբաղի բնակչության հումանիտար իրավիճակը, իրավունքներն ու անվտանգությունը»
Միացյալ Նահանգների պետքարտուղարության Կովկասյան բանակցությունների հարցերով ավագ խորհրդական Լուիս Բոնոն այս շաբաթ տարածաշրջանում էր՝ քննարկելու ԱՄՆ-ի աջակցությունը խաղաղ գործընթացին և այն, թե ինչպես լավագույնս հասնել տևական և արժանապատիվ խաղաղության, «Ազատության» հարցմանն ի պատասխան հայտնել են ՀՀ-ում ԱՄՆ դեսպանատնից։
«Ազատությունը», մասնավորապես, հետաքրքրվել էր, թե արդյոք ամերիկացի դիվանագետը հանդիպե՞լ կամ հանդիպելո՞ւ է Ստեփանակերտի ներկայացուցիչներին՝ քննարկելու Բաքու-Ստեփանակերտ երկխոսության հնարավորությունը։
Միացյալ Նահանգների դեսպանատնից հայտնում են, որ ավագ խորհրդականը հանդիպել է հիմնական շահագրգիռ կողմերի հետ՝ աջակցելու Հայաստան-Ադրբեջան խաղաղ գործընթացին։
«Նա եղել է և՛ Ադրբեջանում, և՛ Հայաստանում։ Պարոն Բոնոն քննարկել է Լեռնային Ղարաբաղի բնակչության հումանիտար իրավիճակը, իրավունքներն ու անվտանգությունը», – ընդգծում են ԱՄՆ դեսպանատնից՝ հավելելով, որ Նահանգները հետևողականորեն պնդում է, որ տարածաշրջանում խաղաղությունը պետք է ներառի պաշտպանության այդ միջոցները:
Բոնոյի երևանյան այցը մեկօրյա էր, ապա նա մեկնեց Բաքու։ Ի տարբերություն Բոնոյի մայիսի վերջի այցի` այս անգամ Հայաստանի վարչապետի ու արտգործնախարարի հետ հանդիպումների մասին չհաղորդվեց։ Հանդիպման մասին հաղորդագրություն տարածել է միայն Անվտանգության խորհրդի գրասենյակը։
Բաքվում նրան ընդունել են ԱԳ նախարարն ու այդ երկրի նախագահ Իլհամ Ալիևը։
