Ծննդատներում տեսակցությունները կդառնան անվճար. Հայկական ժամանակ
«Դեկտեմբերի 1-ից ծննդատներում տեսակցությունները կդառնան անվճար: Մասնավորապես, դրա մասին երեկ համապատասխան հրաման է ստորագրել ՀՀ առողջապահության նախարար Դերենիկ Դումանյանը: Ինչպես հայտնի է, արդեն ավանդաբար ծննդկաններին ու նորածիններին այցելողները ստիպված էին լինում դրա համար 2 հազար դրամ վճարել, որովհետև դա համարվում էր վճարովի ծառայություն»,- գրում է «Հայկական Ժամանակ» օրաթերթն ու շարունակում.
«Համաձայն նոր կարգի` տեսակցությունները պետք է կազմակերպվեն այցեքարտերի միջոցով, որոնք ծննդկանի կողմից կտրամադրվեն երկու, իսկ առանձին դեպքերում` երեք անձի: Որոշվել է նաև, որ որպես վճարովի ոչ բժշկական ծառայություն` ծննդատներում կարող են տրամադրել անհատական` մեկ անձի համար նախատեսված հիվանդասենյակներ, որոնց վճարը չպետք է գերազանցի 20 հազար դրամը: Բայց որպեսզի ծննդատներում չկարողանան պատճառաբանել, թե բոլոր անվճար հիվանդասենյակներն զբաղված են ու այդպիսով կանանց պարտադրեն վճարովի հիվանդասենյակ վերցնել, նախարարի հրամանով սահմանվել է, որ նման դեպքերում բուժհաստատությունը պարտավոր է անվճար հիմունքներով տրամադրել վճարովի պալատ` մինչև անվճար պալատում տեղ ազատվելը»:
