Խստացվում են զորամասը կամ ծառայության վայրն ինքնակամ լքելու, հրամանը չկատարելու, դասալքության համար սահմանված պատժաչափերը
![](https://168.am/wp-content/uploads/2020/09/Gabriel-Balayan-1.jpg)
Ազգային ժողովում այսօր հրավիրված արտահերթ նիստում առաջին ընթերցմամբ քննարկման դրվեց Քրեական օրենսգրքում փոփոխությունների նախագիծն առաջին ընթերցմամբ ընդունելու մասին հարցը:
«Ներկայացված նախագծով առաջարկվում է լրամշակել Քրեական օրենսգրքի 327-րդ, 327.1, 327.5, 327.6, 328-րդ, 356-րդ, 361-րդ և 362-րդ հոդվածներով նախատեսված արարքների համար պատժաչափերը: Որոշակի հստակություններ են մտցվում իրավակարգավորումներում: Նշված օրենսդրական նախաձեռնությունը կատարվում է Ռազմական դրության, Պատերազմի ժամանակ, կամ մարտի պարագաներում որոշակի գործողություններ կատարելու համար առավել խիստ պատժաչափեր են նախատեսվում»,- հարցը զեկուցելով՝ ասաց Պաշտպանության նախարարի տեղակալ Գաբրիել Բալայանը:
Նշենք, որ Քրեական օրենսգրքի գործող 327-րդ հոդվածով սահմանվում է 4-8 տարի ազատազրկում: Նախագծով առաջարկվում է ժամկետային զինվորական կամ այլընտրանքային ծառայությունից, վարժական հավաքներից կամ զորահավաքներից խուսափելը պատժել 6-12 տարի ազատազրկմամբ:
Գործող ՔՕ 327.1-ով ռազմական դրության կամ պատերազմի ժամանակ այլընտրանքային աշխատանքային ծառայողի կողմից ծառայության վայրն ինքնակամ թողնելը պատժվում է ազատազրկմամբ՝ 3-8 տարի ժամկետով: Նախագծով առաջարկվում է այդ պատժաչափը սահմանել 6-12 տարի:
Նախագծով առաջարկվում է ՔՕ 327.2 հոդվածով սահմանված՝ ռազմական դրության ու պատերազմի ժամանակ այլընտրանքային աշխատանքային ծառայողի կողմից ծառայությունից խուսափելու համար այժմ գործող 6-12 տարի ազատազրկման պատժաչափը փոխարինել 8-15 տարի պատժաչափով:
ՔՕ 327.5 հոդվածով սահմանվող ազատազրկման ձևով պատիժը կրելուց հետո զինվորական կոմիսարիատ ներկայանալուց խուսափելու համար նախատեսված պատժաչափերը՝ նվազագույն աշխատավարձի 50-200-ապատիկի չափով, կամ կալանքով` առավելագույնը 3 ամիս ժամկետով, կամ ազատազրկմամբ` առավելագույնը 1 տարի ժամկետով, ինչպես նաև ռազմական դրության, պատերազմի ժամանակ կամ մարտի պարագաներում նույն արարքի կատարման համար սահմանված 1-3 տարի ժամկետով, նախատեսվում է ավելացնել ու ազատազրկման ձևով պատիժը կրելուց հետո զինվորական կոմիսարիատ ներկայանալուց խուսափելու համար սահմանել նվազագույն աշխատավարձի 200-600-ապատիկի չափով, կամ կալանքով` առավելագույնը 3 ամիս ժամկետով, կամ ազատազրկմամբ` առավելագույնը 3 տարի ժամկետով պատիժ, իսկ ռազմական դրության, պատերազմի ժամանակ կամ մարտի պարագաներում նույն արարքի կատարման համար սսահմանել 2-6 տարի ժամկետով պատիժ:
ՔՕ 327.6 հոդվածով՝ ռազմական դրության, պատերազմի ժամանակ կամ մարտի պարագներում զորամաս կամ հատուկ պահպանվող զինվորական այլ տարածք ապօրինի մուտք գործելու համար 5-8 տարի ազատազրկման փոխարեն՝ նախատեսվում է սահմանել 5-10 տարի ազատազրկում:
ՔՕ 328-րդ հոդվածով սահմանվում է պատերազմի ժամանակ պարհակներ կատարելու կամ հարկեր վճարելուց խուսափելու պատժաչափը: Այժմ գործող առավելագույնը 4 տարի ազատազրկումը նախատեսվում է փոխարինել 1-5 տարի ազատազրկմամբ:
ՔՕ 356-րդ հոդվածով սահմանված ռազմական դրության, պատերազմի ժամանակ կամ մարտի պարագաներում հրամանը չկատարելու համար այժմ գործող 5-15 տարի ազատազրկման փոխարեն՝ կգործի 8-15 տարի ազատազրկում:
ՔՕ 361-րդ հոդվածով սահմանված ռազմական դրության, պատերազմի ժամանակ կամ մարտի պարագաներում զորամասը կամ ծառայության վայրն ինքնակամ թողնելը, որն այժմ պատժվում է 3-8 տարի ազատազրկմամբ, նախագծի ընդունումից հետո կպատժվի 6-12 տարով:
ՔՕ 362-րդ հոդվածով սահմանված ռազմական դրության, պատերազմի ժամանակ կամ մարտի պարագաներում դասալքության համար նախատեսված պատժաչափը՝ 6-12 տարի ազատազրկումը, կդառնա 8-15 տարի: