Խաչիկյանները հանդիպել են
168.am-ի հարցին, թե ինչո՞ւ է ՀՀ աշխատանքի և սոցիալական հարցերի նախարարության Սոցիալական ապահովության պետական ծառայության նախկին պետ Վազգեն Խաչիկյանի փաստաբան Տիգրան Աթանեսյանը հրաժարվել Վազգեն Խաչիկյանի շահերը պաշտպանելու լիազորությունից (hիշեցնենք, որ Տիգրան Աթանեսյանը Վ. Խաչիկյանի համակուրսեցին է), Ախթալայի ՀՀԿ-ական քաղաքապետ, Վ. Խաչիկյանի եղբայր Հայկազ Խաչիկյանը նախ՝ պատասխանեց, թե տեղյակ չէ, ապա ավելացրեց.
– Դե, տարբեր պատճառներ կան, էլի, հիմա ի՞նչ կարևոր է:
– Այսինքն` Դո՞ւք եք հրաժարվել նրա ծառայությունից:
– Հա-հա:
– Գոհ չէի՞ք նրա աշխատանքից: Ի՞նչն էր պատճառը:
– Չէ, տենց ոչ մի պատճառ չկա:
– Ուղղակի փոխեցի՞ք:
– Հա-հա:
– Իսկ տեսե՞լ եք Վազգեն Խաչիկյանին:
– Չէ, չեմ տեսել:
– Ցանկությո՞ւն էլ չեք ունեցել նրան տեսնել, հանդիպել:
– Որ ասեմ չէ` կհավատա՞ք:
– Այսինքն` դիմել եք` մերժե՞լ են Ձեզ:
– Չէ… Մի անգամ տեսել եմ:
– Ե՞րբ:
– Մի քանի օր առաջ:
– Իսկ ինչպե՞ս է զգում իրեն Վազգեն Խաչիկյանը:
– Լավ, լավ:
Որոշ հարցերի պատասխաններ մենք ստացանք նաև Վ. Խաչիկյանի նոր փաստաբանից` Ժորա Վարոսյանից, ով նաև Վ. Խաչիկյանի եղբոր` Կարեն Խաչիկյանի փաստաբանն է: Վերջինս ասաց, որ արդեն երեք օր է` ներգրավվել է` որպես Վ. Խաչիկյանի փաստաբան, և Վ. Խաչիկյանի շահերը պաշտպանելու համար դիմում է գրել Հ. Խաչիկյանը: Ժ. Վարոսյանը նաև նշեց, որ ինքը չի կարող ասել, թե ինչո՞ւ են փոխել նախորդ փաստաբանին: Ժ. Վարոսյանի խոսքով` քրգործը դեռ նախաքննության փուլում է:
Հիշեցնենք նաև, որ այս առնչությամբ Տ. Աթանեսյանը henaran.am-ի հետ զրույցում ասել էր. «Զբաղվածության և ծանրաբեռնվածության պատճառով նախաքննության փուլում ես չեմ ներկայացնի նրա շահերը: Սա երկուստեք պայմանավորվածության արդյունքում է որոշվել: Իսկ արդեն դատաքննության ընթացքում կմիանամ պաշտպանական խմբին»:
Հիշեցնենք նաև, որ Վ. Խաչիկյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին և 2-րդ կետերով, 178-րդ հոդվածի 3-րդ մասին 1-ին կետով, 314-րդ հոդվածով՝ կազմակերպված խմբի կողմից առանձնապես խոշոր չափերով յուրացում, խաբեությամբ առանձնապես խոշոր չափերով հափշտակություն և պաշտոնական կեղծիք կատարելու համար:
