Ռոբերտ Քոչարյանի և մյուսների գործով վարույթը կասեցվել է. «Փաստինֆո»
Դատախազությունը պատրաստվում է բողոքարկել ՀՀ երկրորդ նախագահ Ռոբերտ Քոչարյանի խափանման միջոցը փոխելու մասին Երևանի ընդհանուր իրավասության առաջին ատյանի դատարանի մայիսի 18-ի որոշումը: Այս մասին ‹‹Փաստինֆո››-ի թղթակցի հետ զրույցում ասաց ՀՀ գլխավոր դատախազի խորհրդական Գոռ Աբրահամյանը:
Հիշեցնենք, որ մայիսի 18-ին դատարանը՝ դատավոր Դավիթ Գրիգորյանի նախագահությամբ, փոխեց Ռոբերտ Քոչարյանի խափանման միջոցը՝ կալանավորումը, անձնական երաշխավորությամբ։
Նա տեղեկացրեց նաև, որ մտադիր են ինքնաբացարկի միջնորդություն ներկայացնել դատավորին, սակայն դժվարացավ նշել հիմքերն ու ժամկետները՝ ասելով, որ այս պահին աշխատում են դրա վրա:
‹‹Փաստինֆո››-ի դիտարկմանը, թե ինչն է փոխվել այս 2 օրերի ընթացքում, որ դատախազները փոխել են իրենց դիրքորոշումը, քանի որ մայիսի 13-ին, երբ Քոչարյանի փաստաբաննները ինքնաբացարկի միջնորդություն էին ներկայացրել՝ դատախազները դեմ էին արտահայտվել, Աբրահամյանը չպատասխանեց՝ ասելով, որ կխոսեն երբ որոշումը պատրաստ լինի:
«Փաստինֆո»-ի տեղեկություններով դատավորը որոշում է կայացրել վարույթը կասեցնելու մասին եւ դիմել ՍԴ: Ռոբերտ Քոչարյանի պաշտպանական խմբի մամուլի քարտուղարը տեղեկացրեց, որ դեռևս չեն ստացել որոշումը, հետևաբար այս պահին չեն կարող մեկնաբանել:
