Երբ պարգևները բաժանվում քաղաքական հավատարմության համար, արժեզրկվում են թե՛ պետական շքանշանը, թե՛ իրական ծառայությունը հայրենիքին. Անուշ Պողոսյան
«Առողջության իրավունք» հասարակական կազմակերպության նախագահ Անուշ Պողոսյանը գրում է. «Երբ երկրում առողջապահությունը շարունակում է մնալ ծանրաբեռնված բուժաշխատողների, չլուծված համակարգային խնդիրների, մարզային բուժօգնության անկման, անվերջ բյուրոկրատիայի և հանրային դժգոհության կենտրոնում, իշխանությունը որոշել է ամենաբարձր պետական պարգևներից մեկը հանձնել հենց ոլորտի պատասխանատու նախարարին։
Սա պարզապես պարգևատրում չէ․ սա քաղաքական ուղերձ է, որ այս իշխանությունը առողջապահության ներկայիս վիճակը համարում է հաջողություն։
COVID-ի տարիների կորուստները, բուժաշխատողների նկատմամբ վերաբերմունքը, չկայացած բարեփոխումները, կադրային քաոսը, ոլորտի քաղաքականացումը, հիվանդանոցների և բժիշկների վրա աճող ճնշումները՝ այս ամենից հետո «Հայրենիքին մատուցած ծառայությունների համար» 1-ին աստիճանի շքանշանը շատերի համար ոչ թե գնահատական է, այլ հանրության հանդեպ անհարգալից վերաբերմունքի հերթական դրսևորում։
Եվ հատկապես ցավոտ է, երբ այս պարգևատրումը տեղի է ունենում այն ֆոնին, երբ հասարակությունը դեռ չի մոռացել պատերազմից հետո հերոսների մարմինների հետ կապված խայտառակ պատմությունները, և զոհվածների ընտանիքների ցավնը։ Այդ ամենից հետո պետական բարձրագույն պարգև հանձնելը շատերի համար ոչ թե հպարտության, այլ բարոյական ճգնաժամի խորհրդանիշ է դարձել։
Երբ պարգևները բաժանվում քաղաքական հավատարմության համար, արժեզրկվում են թե՛ պետական շքանշանը, թե՛ իրական ծառայությունը հայրենիքին։
Հ․Գ․ Սիրելի՛ քաղաքացի, գնա՛ ընտրության, որպեսզի մեր երկրում վերականգնվի արժանապատվությունը, պատասխանատվությունն ու պետականության զգացումը»։
