Ռոբերտ Քոչարյանը զինծառայողների, ուսուցիչների ատեստավորման համակարգում վերանայումների անհրաժեշտություն է տեսնում
«Հայաստան» դաշինքի անդամները՝ նախընտրական ցուցակը գլխավորող Ռոբերտ Քոչարյանի հետ Հայաստանում հունիսի 7-ին կայանալիք խորհրդարանական ընտրությունների քարոզարշավի չորրորդ օրն այցելել են Գեղարքունիքի մարզ։
Դաշինքի ներկայացուցիչները կանգառ են կատարել մարզի Ճամբարակ քաղաքում ու Դպրաբակ գյուղում, զրուցել բնակիչների հետ՝ նրանց ներկայացնելով իրենց դաշինքի նախընտրական ծրագիրը։
Դպրաբակ գյուղում բնակիչներից մեկի հետ զրույցում դաշինքի առաջնորդ Ռոբերտ Քոչարյանն անդրադարձել է Հայաստանում ուժային կառույցների աշխատակիցների ատեստավորման մեխանիզմներին և աշխատավարձերին՝ ներկայացնելով նաև, թե ինչ փոփոխություններ են անելու այդ ուղղությամբ, եթե ընտրությունների արդյունքներով կարողանան իշխանություն ձևավորել։
«Այն կառույցներում, որոնք կապված են այլ ֆունկցիաների հետ՝ դատախազություն, քննչական կոմիտե և այլն, ոչ մի ատեստավորում չկա․ աշխատավարձերը միանգամից բարձրացնում են և վերջ, բայց բանակից, ուսուցչից ատեստավորում են ուզում։ Փոխելու ենք․ այս ամենն ամբողջությամբ վերանայվելու է»,-նշել է Ռոբերտ Քոչարյանը։
Նա նաև ասել է, որ ընտրություններում իր թիմի հաջողության դեպքում վերանայելու են գյուղատնտեսությամբ զբաղվողներին պարարտանյութ, դիզվառելիք, թունաքիմիկատներ տրամադրելու կարգը։
«Հայաստան» դաշինքի առաջնորդը, անդրադառնալով Լեռնային Ղարաբաղից տեղահանված բնակչության բնակապահովման խնդիրներին, վստահություն է հայտնել, որ այդ հարցը 2-3 տարում կարելի է ամբողջությամբ լուծել։
Դաշինքի անդամները համայնքի բնակիչներին տեղեկացրել են, որ իրենց ծրագրի համաձայն՝ գյուղատնտեսական աշխատանքը պետք է ստաժ համարվի։
Այնուհետև «Հայաստան» դաշինքի անդամները իրենց քարոզարշավը շարունակել են Տավուշի մարզի Դիլիջան քաղաքում։
