Օրը որքան աղ պետք է օգտագործեն մեծահասակները
Աղի օգտագործումը մեր ամենօրյա սննդակարգի անբաժանելի մասն է, սակայն դրա չարաշահումը կարող է լուրջ հետևանքներ ունենալ առողջության համար․ մեծացնելով սրտամկանի զարկերակային գերճնշման, ինֆարկտի, ինսուլտի և միզաքարային հիվանդությունների զարգացման ռիսկը։ Աղի օգտագործման նվազեցումը մինչև առաջարկվող մակարդակ՝ օրական 5 գրամից պակաս, հնարավորություն կտա ամեն տարի կանխել մինչև 1.7 միլիոն մահ ամբողջ աշխարհում։ Այս մասին հայտնում է ՀՀ առողջապահության նախարարությունը։
Տվյալները ցույց են տալիս, որ աղ շատ են օգտագործում նաև Հայաստանում.
Օրվա ընթացքում օգտագործվող աղի միջին քանակը կազմում է 9.8 գրամ:
Մոտավորապես յուրաքանչյուր երրորդ մեծահասակ (35%) կանոնավոր կերպով աղ կամ աղային սոուսներ է ավելացնում սննդին՝ ուտելուց առաջ կամ ընթացքում:
Բնակչության շուրջ 31%-ը հաճախ օգտագործում է շատ աղ պարունակող վերամշակված սնունդ:
Տղամարդիկ ավելի հաճախ են ավելացնում աղ սննդին և օգտագործում աղով հարուստ վերամշակված մթերքներ:
Առողջապահության համաշխարհային կազմակերպության խորհրդատվության համաձայն՝ մեծահասակները օրական պետք է օգտագործեն 5 գրամից պակաս աղ (մոտավորապես 1 թեյի գդալ):
Երեխաների դեպքում աղի օգտագործումը պետք է լինի ավելի քիչ՝ կախված տարիքից:
Ինչպե՞ս նվազեցնել աղի օգտագործումը
▫️ Սնունդ պատրաստելիս փորձեք նվազեցնել աղի օգտագործումը, պահպանելով սննդի իրական համը:
▫️ Միայն համտեսելուց հետո ավելացրեք աղ:
▫️ Սահմանափակեք աղով հարուստ նախուտեստների և վերամշակված մթերքների օգտագործումը:
▫️ Ուշադրություն դարձրեք սննդամթերքի պիտակներին և ընտրեք ավելի քիչ նատրիում պարունակող ապրանքներ:
▫️ Ձեր սննդակարգում ավելացրեք մրգերի և բանջարեղենի քանակը:
